Էջմիածին քաղաքի Սպանդարյան փողոցի 28 Գ շենքի բնակիչները համախմբվել են մի խնդրի շուրջ. նրանք բողոքում են Viva Cell MTS ալեհավաքի տեղադրման դեմ: Արդեն երկար ժամանակ է, ինչ քաղաքապետարանի և Viva Cell MTS-ի աշխատակիցները շենք են գալիս ընկերությանը պատկանող ալեհավաքի տեղադրման համար: Գիտակցելով, որ ալեհավաքը ճառագայթում է տարածելու՝ բնակիչները չեն ցանկանում, որ այն տեղադրվի շենքի տանիքին: «Առաջին լրատվական»-ին այս մասին տեղեկացրեց շենքի բնակչուհի Անահիտ Տերտերյանը`նշելով, որ բնակիչները չեն հասկանում քաղաքապետարանի աշխատակիցների շահագրգռվածության պատճառը: Ըստ Անահիտի` իմանալով, որ բնակիչները դեմ են, քաղաքապետարանից իրենց որոշումն են պնդում:
«Քաղաքապետարանն ուշադրություն չի դարձնում մեր բողոքներին: Ալեհավաքը շատ ուժեղ ճառագայթում է առաջացնում, վնասում է մեզ և մեր երեխաներին: Երկրորդը` մեր շենքը 40 տարվա վթարային շենք է, և բնակիչները չեն ցանկանում, որպեսզի դա տեղադրվի»,- մանրամասնեց բնակչուհին`հավելելով, որ ցանկանում են իրենց խնդրանքը հասցնել Ռալֆ Յիրիկյանին: Ես վստահ եմ, եթե նա իմանա թույլ չի տա, այլ կկանխի դա»:
Քաղաքապետարանից աջակցություն չստանալով` Սպանդարյան 28 Գ շենքի բնակիչները պատրաստվում են կազմակերպել ստորագրահավաք և դիմում ներկայացնել Viva Cell MTS ընկերության գլխավոր տնօրեն Ռալֆ Յիրիկյանին: Նրանք հուսով են, որ գուցե ընկերության նախագահը կօգնի և որոշումից ետ կկանգնի:
