Грузия Online-ի փոխանցմամբ, Վրաստանի նախագահ Միխեիլ Սաակաշվիլին այսօր Վարշավայում ելույթ է ունեցել «Եվրոպայի զարգացման օրեր» կոնֆերանսում, որում նշել է, որ 21-րդ դարում բռնապետությունից ավելի վտանգավոր բան գոյություն չունի.
«Այսօր մենք խոսում ենք, թե ինչ է կատարվում Թունիսում և Աֆրիկայի մյուս անկյուններում։ Այսօր մենք զրուցում ենք, թե ինչ է կատարվում Մոսկվայի փողոցներում։ Այդ իրադարձությունները բոլորին ցույց են տալիս, որ հաճախ անհաղթահարելի և շատ կայուն թվացող բանը դառնում է բավական փխրուն։ Երբեմն պետք է հաշտվել իրականության հետ և այն ընդունել այնպես, ինչպիսին կա։
21-րդ դարում չկա ավելի վտանգավոր բան, քան բռնապետությունը։ Չկա ավելի վտանգավոր բան, քան տեղեկատվության վրա վերահսկողություն սահմանելը։ Հենց դա է տեղի ունենում այն երկրների հետ, որոնց մասին մենք խոսում ենք։
Բռնապետներն անտանելի են դարձել իրենց ժողովրդի համար։ Նրանք փորձում են իրենց հասարակությանը ցույց տալ, թե որքան ուժեղ են, և երբեմն նաև ցուցադրում են իրենց մարմինը։ Նրանք երբեմն ցուցադրում են, թե որքան անգութ են, սակայն դա հասարակության ատելությունը հարուցելու կարճագույն ուղին է»։
Հիշեցնենք, որ այս տարվա նոյեմբերի վերջին Սաակաշվիլին հայտարարել էր, որ Ռուսաստանի վարչապետ Վլադիմիր Պուտինի իշխանության օրերը հաշված են։
