Պենտագոնի ղեկավար Լեոն Պանետան Աֆղանստանում ելույթ ունենալով ամերիկացի զինվորների առաջ, հայտարարել է, որ միջազգային կոալիցիան հաղթանակ է տանում Աֆղանստանի ռազմական արշավում:
Ինչպես հաղորդում է «Ազատություն» ռադիոկայանը, ամերիկյան ռազմական գերատեսչության ղեկավարն ընդգծել է, որ ԱՄՆ-ը, վերջին հաշվով, կարող է Աֆղանստանը վերածել մի երկրի, որն ի վիճակի է ապահովել սեփական անվտանգությունը: Նրա խոսքերով, դաշնակիցները կհասնեն այն բանին, որ «Թալիբանը» և «Ալ-Քաիդան» չեն կարողանա ապաստան գտնել Աֆղանստանում:
Պանետան կարծում է, որ 2011 թ. բեկումնային է Աֆղանստանի օպերացիայի համար, քանի որ այս տարվա ընթացքում հաջողվել է զգալիորեն կրճատել երկրում բռնության մակարդակը:
Հիշեցնենք, որ հունիսին ԱՄՆ նախագահ Բարաք Օբաման հայտարարել էր, որ ԱՄՆ-ը այս տարի պատրաստվում է Աֆղանստանից դուրս բերել 10 հազար զինծառայողների, մինչև 2012 թ. ամառը՝ 33 հազար, իսկ մինչև 2014 թ. զորքերի դուրսբերման գործընթացն ավարտված կլինի:
