Ամուսնու ընտանիքի կողմից խոշտանգումների և դաժան բռնությունների ենթարկված Մարիամ Գևորգյանը շուրջ մեկ տարի է, ինչ իր հարազատ` Արարատի մարզի Տափերական գյուղում է: Այժմ նա սպասում է, որ իրեն դաժանորեն խոշտանգած ընտանիքը օրենքով ստանա իր պատիժը: «Առաջին լրատվական»-ի հետ զրույցում Մարիամն ասաց, թե բավարարված է, որ ամուսինն ու սկեսուրն արդեն Հայաստանում են և հարցաքննվում են:
«Վերջնական բավարարված կլինեմ այն ժամանակ, երբ նրանք ստանան օրենքով իրենց արարքների համարժեքը: Սպասում եմ, թե հետագա արդյունքներն ինչպիսին կլինեն»,- նշեց Մ. Գևորգյանը: Նա այն համոզմանն է, որ արդարության համար պետք է պայքարել, պայքարել մինչև վերջ: Այս պահին կան հասարակական կազմակերպություններ և լրատվամիջոցներ, որոնք աջակցում են Մարիամին, նա այդ օգնությունը բարձր է գնահատում:
Անդրադառնալով հարուցված քրգործին`ասաց, որ ի սկզբանե վստահել է իրավապահ մարմիններին: Անմիջապես ոստիկանություն հաղորդագրություն ներկայացնելուց հետո նրան ուղարկել են դատաբժշկական փորձաքննության: «Դատաբժիշկն արձանագրել է բոլոր վնասվածքներ, որ մնացել են իմ մարմնի վրա: Հիմա գործն ընթացքի մեջ է, տեսնենք, թե ինչ կլինի»,- տեղեկացրեց Մ. Գևորգյանը`հավելելով, որ արդարադատության նախարարությունից, դատախազությունից խոստացել են, որ արդարացիորեն մեղավորները կպատժվեն:
«Գործը գտնվում է նախաքննության փուլում: Այս պահին ցուցմունք է տալիս Մարիամի սկսեսուրը` Հայկանուշը»,- «Առաջին լրատվական»-ին այս մասին հայտնեց փաստաբան Մնացական Սարգսյանը`շարունակելով, որ վաղն արդեն կլինի առերեսում նրա և Մարիամի միջև: Այն հարցին, թե սկեսուրն ընդունո՞ւմ է իրեն առաջադրված մեղադրանքները, պատասխանեց՝ կարծես թե ոչ:
Հիշեցնենք, որ արդեն մի քանի ամիս է քրեական գործ է հարուցվել, որի շրջանակում մայիսին արդեն Ռուսաստանում կալանավորված է եղել Մարիամի սկեսուրը: Մարիամը մեզ հետ զրույցում նաև ասաց, որ հիմա համեմատաբար լավ է զգում, բայց իր հետ պատահածն այն հարվածն էր, որ ամբողջ կյանքում հիշելու է: «Այն չի սպիանա: Ամբողջ կյանքիս վրա մի մեծ բիծ է, որ ինչքան էլ ժամանակի ընթացքում մեղմվի, միշտ կհիշվի»,- ցավով նշեց Մարիամ Գևորգյանը:
Տեղեկացնենք, որ Մարիամ Գևորգյանին ծնողները կնության էին տվել Դավիթ Զիրոյանին: Նրանք տեղափոխվել էին Սանկտ Պետերբուրգ, որտեղ լարված հարաբերություններ են ստեղծվել ընտանիքի և Մարիամի միջև: Այնուհետև Մարիամի նկատմամբ սկսվել են խոշտանգումները՝ դաժան ծեծեր, նվաստացումներ, հոգեբանական ճնշումներ: Այսօր Մարիամի մարմնի վրա դեռ դաջված են տաք արդուկի, պատառաքաղների հետքերը:
«Քիթս է կոտրված, որն արդեն վիրահատվել է, կրծքերս են այրված, ձեռքս է կոտրված, մնացած հոգեբանական ճնշումների մասին արդեն չեմ մանրամասնում»,- ցավով հիշեց Մարիամը: Ամուսնությունից 10 ամիս անց Մարիամին հաջողվել է վերադառնալ Հայաստան. օդանավակայանում հայրը` Համազասպ Գևորգյանը, չի ճանաչել դստերը:
