Այսօր տեղի ունեցավ «Նախադեպային իրավունքը արդարադատության իրականացման գործընթացում» գրքի շնորհանդեսը: ՀՔԱ Վանաձորի գրասենյակի կողմից 2001-2011 թվականների ընթացքում նախաձեռնված և իրականացված դատական գործերի ձեռնարկի շնորհանդեսին բացման խոսքով հանդես եկավ ՀՔԱ Վանաձորի գրասենյակի տնօրեն Արթուր Սաքունցը: Ըստ Ա. Սաքունցի` գրքում ներառված է ՀՔԱ Վանաձորի գրասենյակի վերջին տասը տարիների գործունեությունը:
«Կարևորում ենք, որ իրավապաշտպան կազմակերպության կողմից իրավական խորհրդատվությունը չսահմանափակվի միայն օրենքների վերլուծությամբ, այլ նաև օրինակ ցույց տրվի, թե ինչպես պետք է տարվի գործը: Գրքում ներկայացված են շատ տարբեր գործեր»,- մեկնաբանեց իրավապաշտպանը` համոզված լինելով, որ այս ներդրումը կնպաստի փաստաբանական ինստիտուտի կայացմանը:
Նշենք, որ գրքի հրատարակությունը ՀՔԱ Վանաձորի գրասենյակն իրականացրել էր «Քաունթերփարթ ինթերնեյշնլ» հայաստանյան ներկայացուցչության հետ համատեղ: Ինչպես նշեց ներկայացուցչության տնօրեն Ալեքս Սարդարը` շատ հպարտորեն են աջակցել ծրագրին: Ըստ նրա` իրենք հաճախ չեն ֆինանսավորում գրքեր, հավաքածուներ. ծրագրին մասնակցելու հիմնական պատճառն այն է, որ ծանոթ են ՀՔԱ Վանաձորի գրասենյակի գործունեությանը և գիտեն` այդ հետազոտությունը չի մնա սոսկ որպես հետազոտություն:
«Գիրքը կդառնա հետագա գործունեության քարտեզ: Արդարադատության մշակույթը կայացման փուլում է:Սա շատ կարևոր գործիք է»,- կարծիք հայտնեց Ա. Սարդարը` հավելելով, որ պետք է հիշել` նմանատիպ գործունեությունները պետք է հասանելի լինեն ոչ միայն մասնագետներին, այլև ավելի լայն զանգվածներիին` ոչ մասնագիտական: Շնորհանդեսին իրավապաշտպանները ներկայացրին գրքում ներառված մի քանի գործեր:
