Իրանական Fars News լրատվական գործակալության փոխանցմամբ՝ Իրանի պաշտպանության նախարար Ահմադ Վահիդին լրագրողների հետ զրույցում պատասխանել է ԱՄՆ նախագահ Բարաք Օբամային, որը Իրանից խնդրել էր վերադարձնել Իրանի տարածքում կորսված ամերիկյան RQ-170 Sentinel անօդաչու թռչող սարքը (ԱԹՍ).
«Մեր երկիրն ինքն է որոշում, թե ինչ է պետք անել ամերիկյան լրտես ինքնաթիռի հետ։ Այն արդեն Իրանի սեփականությունն է։ Օբաման մոռացել է, որ այդ ԱԹՍ-ն ներթափանցել է Իրանի օդային տարածք, որպեսզի հետևի մեր օբյեկտներին։ Ավելի լավ կլիներ, եթե Օբաման դրա համար ներողություն խնդրեր և ընդուներ Իրանի ինքնիշխանության խախտումը»։
Հիշեցնենք, որ ավելի վաղ Իրանի նախագահ Մահմուդ Ահմադինեժադը հեռուստատեսությամբ հայտարարել էր, թե իրանցի մասնագետները վերծանում են ԱԹՍ-ում առկա տեղեկատվությունը։
