Ունենք փաստեր, ըստ որոնց` 2010 թվականի մայիսի 12-ին Երևանի Կոմիտասի պողոտայում Խաչիկ Մկրտչյանին սպանելու գործով Վռամ Բաղդասարյանին անհիմն մեղադրանք են առաջադրել, և նա դատապարտվել է 14 տարվա ազատազրկման մի հանցանքի համար, որն իրականում չի կատարել: Այսօր կայացած մամուլի ասուլիսում այս մասին հայտարարեց Հելսինկյան ասոցիացիայի փաստաբան Գայանե Խաչատրյանը:
«Անվավեր փաստաթուղթը, որը ՀՀ Ազգային անվտանգության ծառայության տնօրեն Գորիկ Հակոբյանը ուղարկել է ՀՀ գլխավոր դատախազ Աղվան Հովսեփյանին, մակագրված է հետին ամսաթվով` երբ դեռ սպանությունը տեղի չէր ունեցել: Այնպես որ` այդ գրությունը կարելի է քսիֆ համարել:
Դեռևս 2010 թվականի վերջին ՀՀԿ Արաբկիրի տարածքային կառույցի նախկին ղեկավար Հովհաննես Շահինյանը, ում քրոջ որդին` Արսեն Ահարոնյանը, կատարել է սպանությունը, հանդիպել է Սերժ Սարգսյանին: Հանդիպման ժամանակ Սերժ Սարգսյանը խոստացել է, որ գործն այլ ընթացք կստանա: Սրա վկայությունն է դատարանի կողմից ապացույց ճանաչված մի անձի գաղտնալսումը»,- ասաց Գայանե Խաչատրյանը:
Հելսինկյան ասոցիացիայի նախագահ Միքայել Դանիելյանն էլ իր հերթին նկատեց, որ անհիմն մեղադրվող Վռամ Բաղդասարյանը գործի հետ կապ ունի այնքանով, որքանով մասնակցել է սպանության օրը տեղի ունեցած վիճաբանությանը:
«Երկու ամիս շարունակ սպանության մեջ մեղադրվում էին միաժամանակ երկու մարդ` Վռամ Բաղդասարյանը և Արսեն Ահարոնյանը: Գործի էությունը հետևյալն է. Հովհաննես Թամամյանը, որը քննել է այս գործը, 100 հազար դոլարի չափով գումար է տվել Հովհաննես Շահինյանին, որը հետո չի կարողացել վերադարձնել գումարը: Հովհաննես Թամամյանը հենց այս գործի շրջանակներում էլ ազատվել է աշխատանքից : Նա շատ մտերիմ հարաբերությունների մեջ է եղել Հովհաննես Շահինյանի հետ, թե չէ` անծանոթ մարդուն այդքան մեծ գումար չեն տալիս: Բայց մեր բուն թեման ոչ թե Հովհաննես Թամամյանին պաշտպանելն է, այլ այն, որ այս գործի շրջանակներում տուժեց մի անմեղ երիտասարդ»,- նկատեց նա:
Փաստաբան Գայանե Խաչատրյանն էլ հավելեց, որ քրեական գործն այլևս ճիշտ հունով չի ընթանում, և դժվար թե որևէ մեկը փորձի այլ ընթացքով տանել այն, երբ Սերժ Սարգսյանը և Աղվան Հովսեփյանն են խառնված դրան:
«Ներկայում գործը գտնվում է Վերաքննիչ դատարանում, և հույս ունենք, որ այնտեղ գործը կմակագրվի այնպիսի դատավորի, որը տղամարդկություն կունենա և գործն օբյեկտիվ կվարի: Քրեական գործում որևէ ապացույց չկա, որը փաստում է Վռամ Բաղդասարյանի մեղավորությունը: Զենքերի վրայից հեռացված են բոլոր մատնահետքերը, իսկ Շահինյանի` ցուցմունքներ տված հարազատներն այնպես են արել, որ նրա քրոջ որդին` Արսեն Ահարոնյանը, զերծ մնա պատժից:
Մենք ուզում ենք, որ արդար քննություն և արդար դատ լինի: Խաչիկ Մկրտչյանը սպանվել է «Մակարով» տեսակի ատրճանակից` այն դեպքում, երբ Վռամ Բաղդասարյանի ձեռքին այլ մակնիշի ատրճանակ է եղել»,- նշեց փաստաբանը:
Գայանե Խաչատրյանը նաև տեղեկացրեց, որ մինչև սպանության դեպքը Վռամ Բաղդասարյանն ու Արսեն Ահարոնյանը ընկերական հարաբերություններ են ունեցել:
