Ադրբեջանական Turan լրատվական գործակալության փոխանցմամբ՝ Ադրբեջանի մայրաքաղաք Բաքվում մի խումբ երիտասարդ ակտիվիստներ նախաձեռնել են հերթական անհաջող ակցիան՝ գրքեր ընթերցելու նկատմամբ հասարակության հետաքրքրությունը մեծացնելու համար։
Երկու տասնյակ երիտասարդներն առաջնորդվել են «Եկե՛ք գրքեր ընթերցենք» կարգախոսով և սկսել են գրքերով «զինված» նստել Բաքվի փողոցների նստարաններին։ Ապա նրանք հայտնվել են Ադրբեջանի ազգային գրադարանի շենքի առջև և, գրքերը պահելով իրենց գլխավերևում, համաքաղաքացիներին կոչ արել ավելի շատ զբաղվել ընթերցանությամբ։
Սակայն շուտով գործին միջամտել է ոստիկանությունը և երիտասարդներից պահանջել ցրվել։
Նշվում է, որ դեկտեմբերի 6-ին էլ «Ազատ երիտասարդություն» կազմակերպությունը Բաքվի մետրոպոլիտենում էր սկսել գրքեր բաժանել։ Այդ դեպքում նույնպես գործին միջամտել էր ոստիկանությունը՝ ընդգծելով, որ այդ երիտասարդները հասարակական կարգ են խախտում։
