«Ժառանգություն» կուսակցության առաջնորդ Րաֆֆի Հովհաննիսյանը բացթողում և տապալում է համարում ԱԺ-ում Հայաստանի կողմից ԼՂ անկախության ճանաչման մասին իրենց հեղինակած օրինագծի ձախողումը: Այս մասին նա հայտարարեց այսօր կայացած մամուլի ասուլիսում:
Հովհաննիսյանը միաժամանակ վստահություն հայտնեց, որ «Ժառանգությունը» առաջիկա խորհրդարանական ընտրությունների արդյունքում ԱԺ-ում մեծամասնություն կկազմի:
«Ես համարում եմ, որ ՀՅԴ-ն և ՀԱԿ-ը ընդդիմություններ են, և կարևոր է, որ նրանք հայաստանյան քաղաքական օրակարգի շուրջ միասնականորեն հանդես գան: Եթե, օրինակ, ՀՅԴ-ն ԱԺ նախագահի այլընտրանքային թեկնածու առաջադրեր, ես մեծ հաճույքով կքվեարկեի նրա օգտին»,- հավաստիացրեց նա:
Անդրադառնալով ամիսներ առաջ Ազատության հրապարակում անցկացրած 15-օրյա իր հացադուլին` Րաֆֆի Հովհաննիսյանը նկատեց, որ դրա արդյունքները դեռ ապագայում կերևան:
«Ես ուզեցի այնտեղ ոչ թե օրակարգ իջեցնել, քաղաքական կենաց-մահու մարտ նախանշել, այլ գիտակցական ընկալման մի փոքրիկ պատուհան բացել: Ուզում եմ հավատալ, որ այդ փոքրիկ պատուհանի ճեղքման արդյունքում հնարավոր է վերանայման ենթարկել անցած ճանապարհը»,- նկատեց նա:
Պատասխանելով լրագրողներից մեկի հարցին` Րաֆֆի Հովհաննիսյանը տեղեկացրեց, որ «Ժառանգությունը» չի քննարկել «Ազատ դեմոկրատներ» կուսակցոթյանը վերաբերող վիքիլիքսյան բացահայտումները:
«Միաժամանակ մեզ հետաքրքիր է լսել, թե ինչպես են իրենց երկրի մասին օտար դեսպանների հետ խոսում իրենց ծայրահեղ դեմոկրատներ անվանողները և մատնության սլաքն ուղղում իրենց գործընկերներին` փորձելով մեկը մյուսի հաշվին միավորներ վաստակել: Օտար դեսպանին առաջարկներ անելով` նրանք փորձում են սեփական վարկը բարձրացնել»,- ասաց Հովհաննիսյանը:
Ամփոփելով` «Ժառանգության» ղեկավարը նկատեց, որ ՀՀԿ-ԲՀԿ միասնական ցուցակը նույնքան հավանական է, որքան ԲՀԿ-ՀԱԿ երկխոսությունը: «Քանի դեռ ոչ մի բան չի եղել, չարժե սնվել այս շեղող ուղղություններով»,- ասաց նա: