Տարեվերջյան եռամսյակի ցուցանիշները բնորոշում են հաջորդ տարվա տնտեսական սպասելիքները: Տնտեսագետ, 1994-1998թթ. ԿԲ նախագահ Բագրատ Ասատրյանն այսօր լրագրողների հետ հանդիպմանը նշեց, որ հոկտեմբերին տնտեսության խիստ անկում կար. «Իշխանությունները բազմաթիվ հարցականներով են ավարտում տարին»:
Բ. Ասատրյանի խոսքով` քաղաքական տարին ըստ էության ավարտված է, եթե, իհարկե, ՀՀ նախագահը հրաժարական չտա, ինչը շատ պատեհ կլիներ, քանի որ մինչ ընտրությունները հայտարարված ծրագրերը տապալվեցին:
Նա շեշտեց, որ 2008 մարտի 1-ի մասին դեռ շատ է խոսվելու, դատապարտելու են մարդկանց, ովքեր ժողովրդի դեմ զենք բարձրացրին:
Որպես անցնող տարվա դրական արդյունք` Բ. Ասատրյանը նշեց ՀԱԿ-կոալիցիա երկխոսությունը, որը, սակայն, արդյունք չէր կարող ապահովել, և դրան իշխանությունները գնացին ընդդիմության և դրսի ուժերի ճնշումների ներքո:
«Հուսահատական բաներ եմ նկատում, բայց, ըստ էության, դրական քաղաքական տարի էր, ընդդիմությունը կայացավ, և նախկինում խայտառակ իրողությունները, օրինակ` ինչպես անցավ Սահմանադրության հանրաքվեն, չեն լինի»,- ասաց Բ. Ասատրյանը` շեշտելով, որ որևէ մեկը չի հայտարարում` թաղի խուժանը մասնակցելո՞ւ է ընտրություններին, թե՞ ոչ, կամ` ընտրակաշառքներ չեն բաժանվելու:
Բանախոսի խոսքով` ներկայում քաղաքական որոնումների շրջան է, իսկ 2012 թ. ակտիվ շրջան է լինելու, վերաձևավորումներ կլինեն, այն բոլոր ուժերը, որ կարծում են, թե երկրի ապագան է վտանգված, պետք է միավորվեն:
Բ. Ասատրյանը համոզված է, որ նախկին կարծրացած մթնոլորտը չի լինի, և դրա վկան են Ռուսաստանում տեղի ունեցող իրադարձությունները:
ՀՀԿ պատգամավոր Մանվել Բադեյանը նույնպես տարին արժևորեց ի հայտ եկած նոր երևույթով` երկխոսությամբ: Նրա կարծիքով` քաղաքական ուժերի մեջ կոնֆրոնտացիայի վերջը պետք է տրվի, սակայն ընդդիմության պահանջներն անիրականանալի էին ի սկզբանե:
«Պարզ էր, որ այդ պահանջը չէր կատարվելու, և դրա մասին խոսել չարժեր»,- նշեց Մ. Բադեյանը` հավելելով, որ հակառակ ճամբարում կան մարդիկ, որ ոչ պակաս ինտելեկտուալ և սրտացավ են, երկու կողմն էլ պետք է դա հասկանա:
Պատգամավորը համաձայնեց, որ տարեցտարի, ընտրությունից ընտրություն դրանց որակը պետք է բարելավվի, բայց եթե մեղավոր է ընտրակաշառք տվողը, նույնքան մեղավոր է ընտրկաշառք վերցնողը.
«Ինձ էլ են առաջարկել 5 հազար դրամ, և վերցրել եմ, բայց պատվերը չեմ կատարել: Քաղաքացին մեղք չունի, որ իրեն ընտրակաշառք առաջարկում են, մեղք ունի, որ պատվերը կատարում է»:
Բ. Ասատրյանը հայտարարեց, որ ընտրակաշառքը հանցագործություն է պետության դեմ, խեղճ պետությունն անպաշտպան է, ազգային անվտանգությունը և մյուս ծառայությունները փաստացի չեն պաշտպանում:
Բ. Ասատրյանը նաև հայտարարեց, որ իշխանությունը պարտավոր է լեգիտիմ ընտրություններ անցկացնել, քանի որ ցանկացած էական խախտում նշանակում է, որ իշխանությունը օրինական չէ: