«Մենք պետք է նպաստենք կողմերի միջեւ երկխոսությանը, որպեսզի հիմնախնդիրը լուծվի ԵԱՀԿ Մինսկի խմբի շրջանակներում»,- այսօր Երեւանում լրագրողների հետ հանդիպմանը նշել է ԵԽ գլխավոր քարտուղար Թորբյորն Յագլանդը՝ անդրադառնալով ղարաբաղյան խնդրին։ Պատասխանելով հարցին, թե արդյո՞ք ԵԽ-ն չի կարող որեւէ կերպ զսպել ԵԽ անդամ Ադրբեջանի անօրինական գործողությունները, որպեսզի այդ երկիրը պարբերաբար չխախտի հրադադարի ռեժիմը, ԵԽ գլխավոր քարտուղարը ասել է. «Պետք է հասկանալ աշխատանքների տարանջատումը։ ԵԽ-ն մարդու իրավունքների պաշտպանությամբ եւ ժողովրդավարության հաստատմամբ է զբաղվում։ Ունենք Մինսկի գործընթաց, բոլորն ասում են, որ հիմնախնդիրը պետք է Մինսկի շրջանակներում լուծվի»։ Ըստ Յագլանդի՝ ԵԽ-ն միշտ էլ հայտարարել է, որ կնպաստի խնդրի խաղաղ լուծմանը՝ հակամարտող կողմերի միջեւ ապահովելով երկխոսություն. «Միջամտելու լծակներ չունենք, բայց մարդու իրավունքների տեսանկյունից կարող ենք դիտարկել խնդիրը եւ կողմերին խնդրել չոտնահարել մարդկանց իրավունքները»։ Անդրադառանալով հայ-թուրքական հարաբերությունների կարգավորմանը` Թորբյորն Յագլանդը նշել է, որ իրենք հենց սկզբից կողմ էին հայ-թուրքական արձանագրությունների ստորագրմանը, ինչը երկխոսություն կապահովի Հայաստանի, Ադրբեջանի եւ Թուրքիայի միջեւ։
