Իրանական IRNA լրատվական գործակալության փոխանցմամբ՝ Կասպից ծովի իրանական հատվածում հայտնաբերվել է խոշոր գազային հանքավայր։ Այս մասին հայտարարել է Իրանի նավթի նախարար Ռոստամ Ղասեմին։
Վերջինիս խոսքերով՝ այդ գազային հանքավայրը գտնվում է ափից 190 կիլոմետր հեռավորության և 700 մետր խորության վրա. «Նախնական գնահատականներով՝ այս գազային հանքավայրի պաշարները կազմում են ավելի քան 3.5 տրիլիոն խորանարդ մետր։ Դա 10 անգամ գերազանցում է ադրբեջանական «Շահ Դենիզ» գազային հանքավայրի պաշարները։ Չի բացառվում, որ նույն շրջանում հայտնաբերվեն նաև նավթի զգալի պաշարներ»։
