Ռուսական Regnum լրատվական գործակալության փոխանցմամբ, երեկ Ֆրանսիայի Սենատում տեղի է ունեցել «կլոր սեղան»՝ նվիրված ղարաբաղյան հակամարտության կարգավորմանը։ Դրանում ԵԱՀԿ Մինսկի խմբի ֆրանսիացի համանախագահ Բեռնար Ֆասիեն, որին 2012 թվականի հունվարից այդ պաշտոնում փոխարինելու է Ժակ Ֆորը, ներկաներին իրազեկել է ԵԱՀԿ Մինսկի խմբի գործունեության մասին.
«Չնայած ԵԱՀԿ Մինսկի խումբն իր գործունեությունը սկսել է 1994 թվականի մայիսին, նրա հիմնական գործունեությունը սկսվել է 1997 թվականից հետո։ Ճիշտ չեմ համարում ԵԱՀԿ Մինսկի խմբին անգործության մեջ մեղադրելը։ Մենք չենք կարող հակամարտող կողմերին ստիպել ընդունելու հակամարտության կարգավորման վերջնական տարբերակը։ Նրանք իրենք պետք է գան այդպիսի փոխհամաձայնության։ Մենք էլ պետք է նրանց օգնենք այդ հարցում։
Այսօրվա մեր առաջադրանքը պատերազմի վերսկսումը թույլ չտալն է։ Այն կարող է բռնկվել ցանկացած պահի։ Մեր երկրորդ հաջողությունն այն է, որ հակամարտող կողմերն այսօր նստում են բանակցային սեղանի շուրջ։ Բացի այդ, այսօր Հարավային Կովկասը մեն-մենակ չի մնացել Ռուսաստանի դեմ, հակամարտության կարգավորման գործընթացում խորհրդակցություններ են անցկացվում Ֆրանսիայի ու ԱՄՆ-ի հետ։
Կազանյան հանդիպումից հետո բանակցային գործընթացը հայտնվեց փակուղում։ Վիլնյուսում համատեղ հայտարարության ընդունումից հետո՝ հունվարից սկսած, նախագահների մակարդակով բանակցությունները կարող են աշխուժանալ»։
