Սաուդյան Արաբիայի արքայազն Թուրքի Ալ-Ֆեյսալը Վիեննայում կայացած մամլո ասուլիսի ժամանակ հայտարարել է, որ Սիրիայի արաբ հարևանները թույլ չեն տա, որ արյունոտ պայքարը շարունակվի:
BBC-ի փոխանցմամբ, Ալ-Ֆեյսալն ասել է, որ արաբական պետությունները ձեռքերը ծալած չեն հետևելու, թե ինչպես է մահանում սիրիացի ժողովուրդը:
«Սիրիայի նախագահը դիտավորյալ աչքերը փակում է ակնհայտ փաստերի վրա: Սիրիայի դեմ պատժամիջոցները արդեն ներմուծվել են, սակայն մտածում եմ, որ ապագայում այլ միջոցներ ևս պետք է կիրառվեն»,- ասել է Ալ-Ֆեյսալը: Սակայն նա չի հստակեցրել, թե ինչ մեթոդներ են ապագայում կիրառվելու Սիրիայի նախագահ Բաշար Ալ-Ասադի դեմ, որը հերքում է իր մասնակցությունը հակակառավարական ցույցերի մասնակիցների սպանություններին:
Արքայազնը բացառում է եմենյան սցենարի կրկնությունը`ասելով, որ Բաշարին շատ դժվար կլինի համոզել վայր դնել իշխանությունը: Եմենի պարագայում Սաուդյան Արաբիան հանդես էր գալիս որպես նախագահ Ալի Աբդալլահ Սալեհի լիազորությունները դադարեցնելու գործընթացի միջնորդ:
Հիշեցնենք, որ 2011 թվականի դեկտեմբերի 4-ին Արաբական երկրների լիգան նոր պատժամիջոցներ է կիրառել Սիրիայի դեմ` սառեցնելով 19 բարձրաստիճան պաշտոնյաների հաշիվները, ինչպես նաև կրճատելով արաբական երկրների ավիահաղորդակցութան ծավալները:
Սիրիայում շարունակում են մարտից սկսված հակակառավարական ցույցերը, որի մասնակիցները պահանջում են նախագահ Բաշար Ալ-Ասադի հեռացում և բարեփոխումների անցկացում: Իշխանությունները գնացել են որոշ զիջումների, սակայն ընդդիմության ներկայացուցիչները հրաժարվում են խաղաղ բանակցությունների սեղանի շուրջ նստել: Այս ցույցերի ընթացքում, ըստ ՄԱԿ-ի տվյալների, սպանվել է 4000 բնակիչ: Սիրիայի իշխանությունները իրենց հերթին հայտարարում են, որ որոշ շրջաններում նրանց դիմադրում են լավ զինված ահաբեկչական խմբեր, ուստի ստիպված են ներգրավել բանակային ստորաբաժանումներին:
