Պաղեստինի ինքնավարության ղեկավար, ՖԱԹՀ շարժման առաջնորդ Մահմուդ Աբասը 2012 թ. մայիսին կայանալիք համընդհանուր ընտրություններից հետո չի պատրաստվում իր թեկնածությունն առաջադրել ինքնավարության ղեկավարի պաշտոնում: Այս մասին հաղորդում է պաղեստինյան Al-Quds թերթը՝ վկայակոչելով իր բարձրաստիճան աղբյուրը:
Մահմուդ Աբասը Պաղեստինի ինքնավարության ղեկավար է ընտրվել 2005 թ. հունվարին՝ Յասիր Արաֆաթի մահից հետո:
Աբասը և ՀԱՄԱՍ շարժման քաղբյուրոյի ղեկավար Խալեդ Մաշաալը նոյեմբերի 24-ին Կահիրեում կայացած հանդիպումից հետո համաձայնության են եկել գալիք տարվա մայիսին Պաղեստինում անցկացնել համընդհանուր ընտրություններ, ինչպես նաև ձևավորել միասնական կառավարություն Հորդանան գետի Արևմտյան ափին և Գազայի հատվածում, որը գտնվում է ՀԱՄԱՍ-ի վերահսկողության տակ:
Թերթը գրում է, որ Աբասի որոշումը՝ չառաջադրվել երկրի ղեկավարի պաշտոնում, հակասում է ՖԱԹՀ-ի առաջնորդների ծրագրերին, որոնք պնդում են, որ Աբասը պետք է առաջադրի իր թեկնածությունը:
Հիշեցնենք, որ 2006 թ. տեղի ունեցած խորհրդարանական ընտրություններում ՀԱՄԱՍ-ը հաղթանակ տարավ ՖԱԹՀ-ի նկատմամբ և մեծամասնություն կազմեց Պաղեստինի օրենսդրական խորհրդում:
