Հայաստան մասնավոր տրանսֆերտների հոսքը կարող է նվազել: Ինչպես «Առաջին լրատվական»-ի հետ զրույցում նշեց ԱԺ տնտեսական հարցերի մշտական հանձնաժողովի փոխնախագահ Վարդան Բոստանջյանը, մասնավոր տրանսֆերտների ծավալներն ուղղակիորեն կապված են այն երկրների տնտեսական վիճակով, որտեղ մեր հայրենակիցներն աշխատում են և գումարները ուղարկում: Այստեղ մեծ տեսակարար կշիռ ունի Ռուսաստանը:
Վ. Բոստանջյանի խոսքով, Ռուսաստանում տեղի ունեցած ընտրությունների արդյունքները որոշակի տրանսֆորմացիաների տեղիք են տվել, կայունության առումով փոքր-ինչ ավելի վտանգված է վիճակը, և բնականաբար, տրանսֆերտների ծավալները չեն կարող մեծ լինել:
«Այժմ տրանսֆերտներն ավելի քիչ են, քան ենթադրվում էր: Բայց եթե ՌԴ իշխանությունը կարողանա 2012 թ. կայունության ապահովման համար միջոցառումներ իրականացնել, որ դժգոհների թիվը չշատանա, միայն այդ ժամանակ կարող են տրանսֆերտները մեծանալ: Հակառակ դեպքում, եթե նրանց մոտ էլ տնտեսական ամբողջ համակարգը դադարի լավ աշխատելուց և նահանջ ունենա, դրանով պայմանավորված տրանսֆերտները, բնականաբար, կպակասեն»,- ասաց Վ. Բոստանջյանը:
