Գիտնականները նոր լուծում են գտել բոլոր նրանց համար, ովքեր տառապում են անքնությունից կամ առավոտյան շատ վաղ են արթնանում:
Գիտնականների միջազգային խումբը բացահայտել է, որ երբ առողջ մեծահասակներն օրական երկու բաժակ բալի հյութ են խմում, նրանք օրվա ընթացքում 39 րոպե ավելի երկար են հանգստանում: Այդ 39 րոպեի 25 րոպեն համարվում է ավել քնելու ժամանակը, իսկ 14-ն՝ անկողնում ավել հանգստանալու ժամանակը:
Նրանք նաև բացահայտել են, որ մարդիկ ավելի քիչ են արթնանում գիշերվա ընթացքում՝ համեմատած նրանց հետ, ովքեր բալի հյութ չեն խմել:
Daily Mail-ը գրում է, որ հետազոտությունն անցկացվել է Նորթումբրիա համալսարանում և հրապարակվել է եվրոպական Journal of Nutrition ամսագրում:
Մասնակիցների մի խմբին օրական տրվել է երկու բաժակ բալի հյութ, իսկ մյուսներին՝ ջուր կամ այլ հյութ: Ամեն օր նրանցից մեզի անալիզ են վերցրել՝ պարզելու համար օրգանիզմում մելատոնինի չափը, որով էլ պայմանավորվում է մեր քնելու ռեժիմը:
Պարզվել է, որ բալի հյութն օգնում է գիշերվա ընթացքում ավելի երկար և արդյունավետ քնել: Հետազոտողները դա կապում են կարմիր հյութում առկա մելատոնինի չափաբաժնի հետ:
