ԱԳ նախարարության լրատվական ծառայությունից «Առաջին լրատվական»-ին տեղեկացնում են, որ դեկտեմբերի 9-ին ԱԳ նախարար Էդվարդ Նալբանդյանը հանդիպել է Լիբանանի նախագահի գլխավորած պատվիրակության կազմում Երևան ժամանած Լիբանանի արտաքին գործերի և էմիգրանտների հարցերով նախարար Ադնան Մանսուրին:
Ողջունելով լիբանանցի գործընկերոջը` Հայաստանի արտգործնախարարը նշել է, որ Լիբանանի նախագահի պաշտոնական այցելությունը Հայաստան առավել կամրապնդի բարեկամության դարավոր ավանդույթների վրա հիմնված հայ- լիբանանյան հարաբերությունները:
«Լիբանանի նկատմամբ հատուկ ջերմ զգացմունքներ եմ տածում, քանի որ դիվանագիտական գործունեությունս սկսել եմ շուրջ 35 տարի առաջ հենց Բեյրութում և ձեր երկրում ունեմ շատ բարեկամներ», – ասել է նախարար Նալբանդյանը:
Նախարար Մանսուրը իր հերթին նշել է, որ Հայաստանի և Լիբանանի միջև հարաբերությունները գտնվում են բարձր մակարդակի վրա և իր երկիրը շահագրգռված է Հայաստանի հետ փոխգործակցության առավել ընդլայնմամբ:
Նախարարները երկու երկրների ղեկավարների հանձնարարությամբ քննարկել են փոխայցելությունների և շփումների պարբերական կազմակերպման, երկկողմ համագործակցության զարգացման նպատակով ձեռնարկվելիք քայլերը: Այս առումով երկուստեք ընդգծվել է, որ անհրաժեշտ է քաղաքական հարաբերությունների առկա բարձր մակարդակը լրացնել տնտեսական, կրթական, մշակութային և այլ ոլորտներում համագործակցության խորացմամբ և նշվել է, որ այսօր ստորագրված երկկողմ փաստաթղթերը լուրջ խթան կհանդիսանան այդ ուղղությամբ:
Պայմանավորվածություն է ձեռք բերվել երկու երկրների ԱԳՆ-երի միջև պարբերական խորհրդատվությունների անցկացման մասին:
Զրուցակիցները մտքեր են փոխանակել միջազգային և տարածաշրջանային հիմնախնդիրների վերաբերյալ, մասնավորապես` արաբական աշխարհում տեղի ունեցող զարգացումների, մերձավորարևելյան կարգավորման և արցախյան հիմնահարցի վերաբերյալ:
