ՀՀԿ-ն գալիք ընտրություններում կստանա գրեթե այնքան ձայն, որքան ստացել է նախորդ ընտրություններում: Այսօր կայացած մամուլի ասուլիսում այս մասին հայտարարեց ՀՀԿ-ական պատգամավոր Ռաֆիկ Պետրոսյանը:
«ՀՀԿ-ն ավելի շատ ձայներ հավաքելու մասին երբեք չի հայտարարել: Միաժամանակ, մենք վստահ ենք, որ ընտրությունների ընթացքում ՀՀԿ-ն լավ արդյունքներ է ունենալու: Դրան կնպաստեն ինչպես ՀՀԿ առաջնորդ, երկրի ղեկավարի նախընտրական խոստումների կատարման մակարդակը, այնպես էլ այն հանգամանքը, որ ՀՀԿ-ն շարունակում է Հայաստանի շուրջ 900 համայնքներից 750-ում ղեկավարներ ունենալ, ովքեր էլ ընտրությունների ժամանակ նպաստելու են կուսակցության` ընտրությունների ժամանակ հնարավորինս շատ ձայներ ստանալուն »,- նկատեց նա:
Անդրադառնալով ՀՀԿ-ԲՀԿ հարաբերություններին, մասնավորապես թմրանյութ պահելու կասկածանքով ձերբակալված ԲՀԿ-ական ներկայացուցչի թեմային` Ռաֆիկ Պետրոսյանը նկատեց, որ օրինապահները կարող են թմրանյութ փնտրել անխտիր բոլորի գրպանում:
«Ուղղակի պատահականություն է, որ այս անգամ ձերբակալվածները եղել են ԲՀԿ-ականներ, մյուս անգամ, հնարավոր է, թմրանյութ հայտնաբերեն ՀՀԿ կամ ՕԵԿ ներկայացուցիչների գրպանում: Այս գործընթացը չպետք է քաղաքականացնել: Երբ օրինապահները համապատասխան տեղեկատվություն ունենան, այն ժամանակ էլ կհայտնաբերեն:
Ինչ վերաբերումէ ԲՀԿ-ին արված ՀԱԿ-ի ակնարկներին, ապա կարող եմ ասել, որ ՀԱԿ-ը սա անում է ՀՀԿ-ի և ԲՀԿ-ի միջև սեպ խրելու նպատակով»,- նկատեց Ռաֆիկ Պետրոսյանը:
Պատգամավորի խոսքով` «պետք է ՀՀԿ-ի ճակատը պաչել», որ նա տարիներ առաջ միահեծան կերպով չի վերցրել իշխանությունը, այլ այն կիսել է երկու այլ ուժերի հետ:
Ասուլիսի մյուս բանախոս, Քաղաքագետների միության նախագահ Հմայակ Հովհաննիսյանն իր հերթին անդրադառնալով թմրանյութային թեմային` նկատեց, որ չի զարմանա, եթե մի «պագոնավոր» հենց ասուլիսի ժամանակ մտնի սենյակ և թմրանյութ փնտրի ու գտնի իր գրպանում:
«Միաժամանակ, զարմանալի է, որ ԲՀԿ ներկայացուցչի գրպանում թմրանյութ են գտնում միայն հիմա` ստեղծված իրավիճակում: Դե, նրանք ֆոկուսնիկներ են, գիտեք»,- ասաց նա:
Հովհաննիսյանի խոսքով` ԲՀԿ-ն դիրքային առավելություն ունի իր մրցակիցների` ՀՀԿ-ի և ՀԱԿ-ի հանդեպ: «Ինքը` որպես գործընկեր, ցանկալի է և առաջինի, և երկրորդի համար: Գագիկ Ծառուկյանը առնվազն կարճատես պիտի լինի, որ չօգտագործի իր առավելությունները»,- նկատեց քաղաքագետը:
Նա նաև տեղեկացրեց` եթե ԲՀԿ-ն ընտրությունների գնա միայնակ և իրեն հրավիրի իր շարքերը, ապա ինքը կմտածի առաջարկի շուրջ:
Անդրադառնալով Ռուսաստանի Պետդումայի ընտրություններին` դրանք որակեց որպես քննություն, որը այդ երկրի իշխող կուսակցությունը` «Եդինայա Ռոսիա»-ն, պատվով հանձնեց:
«Ընտրություններն անցել են համեմատաբար արդար, ազատ և թափանցիկ»,- նկատեց Հմայակ Հովհաննիսյանը:
