Չինաստանի գործարարները ցանկանում են Հայաստանում ներդրումներ կատարել: Այսօր լրագրողների հետ հանդիպմանը ՀՀ ժամանած չինական գործարար պատվիրակության ղեկավար, HUAHE International Business Consulting ընկերության նախագահ Լու Չուանյուն հայտնեց, որ 10 ընկերությունների ղեկավարներ հանդիպումներ են ունեցել ՀՀ էներգետիկայի, գյուղատնտեսության, էկոնոմիկայի նախարարություններում, Առևտրաարդյունաբերական պալատում, հանդիպել են նաև հայ գործարարների, ներկայացվել է երկկողմ ներդրումային միջավայրը:
Քննարկվել են գյուղատնտեսության, լեռնահանքային արդյունաբերության, վերականգնվող էներգետիկայի, դեղագործության ոլորտներում կոնկրետ ծրագրեր իրականացնելու, Երևանում առևտրային կենտրոն և հյուրանոց կառուցելու հարցեր:
Աշխատանքներ են տարվում ՀՀ-ՉԺՀ ուղիղ օդային կապ հաստատելու ուղղությամբ: Չինաստանն ունի ուղիղ օդային հաղորդակցություն Վրաստանի և Ադրբեջանի հետ:
«Գործարար հարաբերություններն ակտիվացնելու դեպքում օդային հաղորդակցության հաստատումը նույնպես շահավետ կլինի ավիաընկերությունների համար»,- ասաց Լու Չուանյուն:
ՀՀ-ում Չինաստանի դեսպանատան խորհրդական Գուան Գանգը նշեց, որ Չինաստանը Հայաստանի երկրորդ առևտրային գործընկերն է, այստեղ շատ շինարարական աշխատանքներ են կատարվել չինական ընկերությունների կողմից. «Ներդրումների համար մեծ հնարավորություններ ենք տեսնում, և դա գրավում է չինացի ներդրողներին»:
Զարգացման հայկական գործակալության գլխավոր տնօրեն Ռոբերտ Հարությունյանի խոսքով` կարծրատիպ կա, որ շատ դժվար է մտնել չինական շուկա, իսկ հայկական շուկան փոքր է չինացիների համար:
2010 թ. Շանհայի ցուցահանդեսից հետո հայկական ընկերությունները սկսել են արտահանում իրականացնել ՉԺՀ, և ըստ Ռ. Հարությունյանի` ներուժը մեծ է: Նա նշեց, որ արտահանվող հայկական ապրանքների դիվերսիֆիկացումը թույլ կտա ավելացնել շրջանառությունը:
«Մինչ այս հենց լեռնահանքային հումք էինք արտահանում, ապագայում պատրաստի և կիսապատրաստի արտադրանք կարտահանվի»,- նշեց Ռ. Հարությունյանը՝ հավելելով, որ քիմիական ոլորտում համագործակցությունը պետք է ոչ միայն կաուչուկի մասով դիտարկել, այլև նուրբ օրգանական քիմիայի, որն օգտագործվում է դեղագործության մեջ:
«Հիմնական խնդիրը ծավալն է և գործընկերային հարաբերություններ հաստատելը»,- ասաց Ռ. Հարությունյանը:
Անդրադառնալով չինացի մատակարարների կողմից փաստաթղթերին չհամապատասխանող անորակ հումք առաքելու խնդրին, որին հաճախ են բախվում հայկական ընկերությունները, Լու Չուանյուն հայտարարեց, թե նման խնդիրներից խուսափելու համար հարկավոր է ճիշտ գործընկերներ գտնել, ճիշտ ուղիով դուրս գալ շուկա, աշխատել պետական աջակցություն ունեցող կազմակերպությունների հետ:
Նա ասաց, որ Չինաստանում նույնպես լուրջ են վերաբերվում անորակ ապրանքներին, և նույնիսկ անորակ ապրանքի դեմ պայքարի հատուկ օր կա:
