ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ դեկտեմբերի 7-ին Ֆրանսիայի Ազգային Ժողովում տեղի է ունեցել Լեռնային Ղարաբաղի անկախության հանրաքվեի ընդունման 20-ամյակին նվիրված ընդունելություն:
Հրավիրյալների թվում են եղել ֆրանսիացի խորհրդարանականներ, սենատորներ, լրագրողներ, մտավորականներ, հայկական համայնքային կառույցների ներկայացուցիչներ:
Նշանավոր իրադարձության կապակցությամբ ելույթներով հանդես են եկել Ֆրանսիայի Ազգային Ժողովի պատգամավորներ Ռիշար Մալյեն, Ֆրանսուա Ռոշբլուանը, Ֆրանսիայում ԼՂՀ ներկայացուցիչ Հովհաննես Գևորգյանը, Ֆրանսիայում Հայաստանի դեսպանության դեսպանորդ Աշոտ Ալեքսանյանը:
Վերջինս նաև անդրադարձել է 1988 թվականի աղետալի երկրաշարժի 23-րդ տարելիցին` երախտագիտություն հայտնելով Ֆրանսիայի կառավարությանն ու ժողովրդին ողբերգության հաղթահարման գործում Հայաստանին ցուցաբերած օժանդակության համար:
Պաշտոնական արարողության շրջանակներում կայացել է նաև «Արցախ` հայ արվեստների և ավանդույթների պարտեզ» պատկերազարդ գրքի շնորհանդեսը, որի հրատարակման գործում մեծ ավանդ են ներդրել Ֆրանսիայում ԼՂՀ ներկայացուցչությունը և Ֆրանսիայում գործող Սատար Ղարաբաղին կազմակերպությունը:
Ինչպես իր խոսքում նշել է գրքի համահեղինակ, արվեստագետ Պատրիկ Դոնաբեդյանը, գիրքը նվեր է Արցախի հանրապետության անկախության 20-ամյակի առթիվ: «Արցախի ժողովրդի ազատության, անկախության հարցն է դրդել մեզ՝ հինգ հեղինակներիս, սկսելու և ավարտին հասցնելու այս գործը»,- նշել է Դոնաբեդյանը: Աշխատությունը նաև արտահայտությունն է արցախի ժողովրդի ստեղծարար մտքի ու ազատատենչ հոգու:
Ֆրանսերեն և անգլերեն երկլեզու աշխատությունն ընթերցողի առաջ բացահայտել է Արցախի պատմությունը, հնագիտական հարստությունը, ճարտարապետությունը, որը ներկայացված է բազմաքանակ եկեղեցիներով, վանքերով ու մատուռներով, խաչքարի արվեստով, ինքնատիպ ոճով ու գունային լուծումներով հարուստ ձեռագիր մատյաններով և վերջապես գորգագործության անկրկնելի արվեստով:
Հեղինակային կազմում ընդգրկված են ֆրանսիացի և ֆրանսահայ հանրահայտ համալսարանականներ, գիտնականներ, Ղարաբաղի պատմության և քաղաքակրթության մասնագետներ: Մեծ է նրանց ներդրումը գիրքը մասնագիտական և ընթերցող լայն շրջաններին հասանելի դարձնելու գործում:
