«Մեր թիմում տեղի է ունենում ուժերի վերաբաշխում և մեր կարծիքով դա հնարավորթյուն է տալու երկրի առջև ծառացած խնդիրները ավելի արդյունավետ լուծելու»,- այսօր ՀՀ էկոնոմիկայի նախարարությունում ներկայացնելով Էկոնոմիկայի նոր նախարար Տիգրան Դավթյանին` ասաց ՀՀ վարչապետ Տիգրան Սարգսյանը: Զգալով , որ նախարարության աշխատակիցները ակնհայտորեն հուզված են, վարչապետը շեշտեց, որ Երիցյանը անցնելու է այլ աշխատանքի. «Տեղյակ եք, որ նա անցնելու է այլ աշխատանքի մեր թիմում և սա ընդամենը նշանակում է մեր կարողությունների, ուժերի վերաբաշխում, ինչ-որ իմաստով նաև` թարմացում»: Երբ վարչապետը շրջվեց Ն. Երիցյանի կողմը, խոսքը փոխանցեց նրան, Երիցյանը ակնհայտորեն անակնկալի եկավ և զարմացական հայացքով նայեց վարչապետին: Իրավիճակը փրկելու համար Վարչապետը ասաց. «դուք պետք է շնորհակալություն հայտնեք»: «Արդեն արել ենք երեկ, բայց հիմա` հրապարակային»,- արձագանքեց Երիցյանը: «Ես ուզում եմ շնորհակալություն հայտնել համատեղ աշխատանքի համար և երեկ մենք առիթ ունեցել ենք անկեղծ խոսակցություն ունենալու: Կարծում եմ, այն բարեփոխումները, որ սկսել էինք, պետք է որ շարունակվեն և մենք այդ իմաստով պարոն Դավթյանի հետ առիթներ ունենք քննարկելու և լավ կողմն այն է, որ այդ բոլոր բարեփոխումները կառավարության նիստերի ընթացքում և դրան նախորդող նիստերին մենք միշտ բանավիճել ենք,քննարկել ենք, որի արդյունքում համատեղ որոշումներ են եղել: Այդ իմաստով կարծում եմ անցումը բավականին սահուն է լինելու, ինքս էլ պատրաստ եմ ցանկացած պահի կիսվել այն տեղեկատվությամբ, որը կրում եմ և որևիցե փաստաթղթին չի հանձնվել և կարծում եմ դա կօգնի, որ մեր նախարարությունում առողջ միջավայրը պահպանվի, շարունակվի և ուզում եմ հաջողություն մաղթել պարոն Դավթյանին»,- ասաց Երիցյանը: Տ. Դավթյանը իր խոսքում շեշտեց, որ ինքը աշխատել է էկոնոմիկայի նախարարությունում, իսկ ֆինանսերի նախարարությունում աշխատած տարիների փորձը կօգնի նոր մոտեցումներով աշխատել նոր պաշտոնում: «Բոլորը հուզված են, ես զգում եմ, հետո կարտահայտվեն»,- վերջում ասաց վարչապետը:
