Հստակ է, որ պետությունը պարտավորություններ ունի Մարտիմեկյան զոհերի հարազատների հանդեպ: «Առաջին լրատվական»-ի հետ զրույցում նշեց իրավապաշտպան, Մարտի 1-ի գործով փաստահավաք խմբի անդամ Սեդա Սաֆարյանը` խոսելով Մարտի 1-ի զոհերի ընտանիքներին փոխհատուցում տրամադրելու մասին:
Իրավապաշտպանն ասաց, որ Մարտի 1-ի զոհերից շատ քիչ մարդ կա, որ առնչություն ուներ այդ օրվա հանրահավաքի հետ: «Տեղի է ունեցել միջադեպ հասարակական վայրում, և պետության պաշտպանական ուժերը, փոխանակ զբաղվեին մարդկանց պաշտպանությամբ, ընդհակառակը՝ միջադեպի մասնակիցն են եղել՝ որպես կողմեր, և արդյունքում մենք ունեցել ենք ոչ թե օրինականության պահպանում, այլ մարդկային զոհեր»,- տեղեկացրեց Ս. Սաֆարյանը` հավելելով, որ պետությունը՝ որպես երաշխավոր, չի կարողացել իր պարտականությունները կատարել:
Անդրադառնալով «ժառանգություն» խմբակցության առաջարկին` նա ասաց, որ «Ժառանգությունը» ճիշտ առաջարկով է հանդես եկել: «Մարդիկ զրկվել են իրենց տան միակ աշխատող և կերակրող անձանցից, կամ անգամ, եթե չընդունենք, որ կերակրողի խնդիր կա, ապա կյանքի արժեքն է փոխհատուցման ենթակա: Երբ մենք փաստահավաք խմբով աշխատանք էինք տանում, եվրոպական երկրների ներկայացուցիչները հաճախ էին վկայակոչում տարբեր երկրների նախադեպերը»,- մեկնաբանեց իրավապաշտպանը` ընդգծելով, որ Մարտի մեկի փաստահավաք խմբում եվրոպական երկրների ներկայացուցիչները այս կամ այն երկրում մասնակցել էին փոխհատուցման գործընթացներին: Նրա փաստմամբ` դա ընդունված կարգ է:
Մարտի 1-ի գործով փաստահավաք խմբի անդամը կարծում է, որ ՀՀ կառավարությունը մերժել է փոխհատուցում տրամադրելու «Ժառանգության» առաջարկը, քանի որ առջևում ընտրություններն են և պետությունն իր չեզոքությունն է պահում, չի ցանկանում հստակ օրենք ունենալ դրա վերաբերյալ: Հիշեցնենք, որ կառավարությունը մերժել է «Ժառանգություն» խմբակցության այն առաջարկը, որով պետությունը հաջորդ տարվա բյուջեից պետք է գումար տրամադրեր Մարտի 1-ի զոհերի ընտանիքներին:
