Եվրոպայի ժողովրդական կուսակցության նախագահ Վիլֆրիդ Մարթենսի կողմից Սերժ Սարգսյանին նույն կուսակցության դիտորդի կարգավիճակի շքանշան հանձնելը պետք է դիտարկել Հայաստանում կայանալիք խորհրդարանական ընտրությունների համատեքստում: «Առաջին լրատվական»-ի հետ զրույցում նման տեսակետ հայտնեց ԵԽԽՎ հայաստանյան պատվիրակության անդամ, «Ժառանգություն» կուսակցության պատգամավոր Զարուհի Փոստանջյանը:
«Ընտրություններից առաջ սա մի տեսակ ուղերձ է ՀՀԿ-ին`պարզելու նրանք իսկապե՞ս եվրոպական արժեքներ կրողներ են և պարտավորվո՞ւմ են այդ արժեքներն առաջ տանել: Իսկ դա առաջին հերթին կերևա ընտրությունները արդար, թափանցիկ և հավասար պայմաններում անցկացնելու պարագայում: Ինչ վերաբերում է Եվրոպայի ժողովրդական կուսակցությանը բուն անդամակցության հարցին, ապա հայտ ներկայացրած հայաստանյան կուսակցությունների՝ ՀՀԿ-ի, «Ժառանգության» և ՕԵԿ-ի հարցը կորոշվի միայն 2012 թվականի փետրվարին»,- նկատեց Փոստանջյանը՝ տեղին համարելով նշել, որ Սերժ Սարգսյանին և նրա ղեկավարած ՀՀԿ-ին տրված դիտորդական կարգավիճակի մասին վկայող նույն շքանշանից տրվել է նաև «Ժառանգություն» կուսակցությանը՝ ի դեմս նրա առաջնորդ Րաֆֆի Հովհաննիսյանի:
Հարցին՝ ինչպե՞ս կմեկնաբանի փաստը, որ դիտորդի կարգավիճակ շնորհելով և՛ իրենց՝ որպես խորհրդարանական ընդդիմություն, և՛ կոալիցիոն մյուս երկու ուժերին, Եվրոպայի ժողովրդական կուսակցությունը, փաստորեն, նույն հարթության մեջ է դնում երեքին էլ, Զարուհի Փոստանջյանը նկատեց. «Չէի ասի, որ խոսքը մեզ բոլորիս մեկ հարթության մեջ դիտարկելու մեջ է: Դա կերևա միայն 2012-ի փետրվարին՝ այն բանից հետո, երբ կհաստատվի անդամության համար դիմած կուսակցությունների հետագա ճակատագիրը»:
Ամփոփելով՝ «Ժառանգություն» կուսակցության պատգամավորը նշեց, որ Եվրոպայի ժողովրդական կուսակցությանն անդամակցելու առաջին սկզբունքը հետևյալն է. որքանո՞վ է դավանում եվրոպական արժեքներին անդամության համար դիմած քաղաքական ուժը:
Նշենք, որ Եվրոպայի ժողովրդական կուսակցության նախագահ Վիլֆրիդ Մարթենսը երեկ ԵԺԿ անդամի կրծքանշան է հանձնել Եվրոպական ժողովրդական կուսակցության պետությունների ղեկավարների հավաքի պատվավոր հյուր Սերժ Սարգսյանին:
