Երևանի քաղաքապետարանի տեղեկատվության
և հասարակայնության հետ կապերի վարչությունից «Առաջին լրատվական»-ին տեղեկացնում են Երևանի քաղաքապետարանի աշխատակազմի Արտաքին ձևավորման և գովազդի, Մշակույթի վարչության պետերն ու աշխատակազմի Առևտրի և սպասակումների վարչության պետի ժամանակավոր պաշտոնակատարը լրագրողներին են ներկայացրել մայրաքաղաքում կազմակերպվելիք ամանորյա տոնական միջոցառումների ծրագիրն ու տոնական ձևավորման մանրամասները:
Արտաքին ձևավորման և գովազդի վարչության պետ Արազ Բաղդասարյանը տեղեկացրել է, որ տոնական միջոցառումների մեկնարկը տրվելու է դեկտեմբերի 20-ին ժամը 20:00-ին, երբ Երևանի քաղաքապետ Տարոն Մարգարյանը հանդիսավորությամբ կմիացնի Հանրապետության գլխավոր տոնածառի լույսերը:
Նա նաև նշել է, որ այս տարի նույնպես 31մ բարձրությամբ տոնածառը հավաքվել է սանիտարական էտումից հետո մարզերից բերված բնական եղևնիների ու սոճիների 6000 ճյուղերով: Տոնածառը զարդարված կլինի ավելի քան 4000 խաղալիքներով ու նաև նոր լուսադիոդային լամպերով: Տոնական օրերին սպասվում է նաև ամանորյա աննախադեպ 3D շոու ծրագիր և հրավառություն: Մայրաքաղաքի արտաքին լուսավորության մասով էլ նշվել է, որ աշխատանքներն այս պահին ընթացքի մեջ են։ 38 փողոց արդեն ձևավորվել է:
Մշակույթի վարչության պետ Կամո Մովսեսյանը, ներկայացնելով ամանորյա միջոցառումների մասին տեղեկատվությունը, նշել է, որ դեկտեմբերի 31-ի գիշերը, հունվարի 6-ին և հունվարի 13-ին Հանրապետության հրապարակում կանցկացվեն համերգային ծրագրեր։ Ազատության հրապարակում և Սահադաշտի վերածված Կարապի լճում, Շառլ Ազնավուրի անվան հրապարակում և մայրաքաղաքի ժամանցի այլ վայրերում սիրված հեքիաթների հերոսների մասնակցությամբ կկազմակերպվեն մանկական խաղեր ու տարբեր մրցույթներ: Համերգային կատարումներով և խաղերով համեմված տոնական միջոցառումներ են անցկացվելու նաև բոլոր վարչական շրջաններում: Վարչության պետը նաև նշել է, որ քաղաքապետարանի աշխատակազմի սոցիալական վարչությունը սոցիալապես անապահով ընտանիքների շուրջ 3000 երեխաների համար նախատեսել է ամանորյա նվերներ և թատերական ներկայացումների տոմսեր:
Աշխատակազմի առևտրի և սպասակումների վարչության պետի պաշտոնակատար Արման Եդոյանը ներկայացրել է վարչության կողմից նախատեսված միջոցառումների ծրագիրը։ Ընդգծվել է դեկտեմբերի 14-ից հունվարի 15-ը Հյուսիսային փողոտայում ամանորյա վրանային տոնավաճառի կազմակերպումը, ինչն, ըստ էության, մեկ վայրից ամանորյա գնումներ կատարելու միջազգային դրական փորձի տեղայնացման նպատակ ունի և հաջողության դեպքում կարող է դառնալ ամենամյա: Բացի այդ, այս տարի նույնպես նախատեսվել է մայրաքաղաքում գործունեություն ծավալող տնտեսավարողների շրջանում անցկացնել մրցույթ` Ամանորյա լավագույն արտաքին ձևավորում անվանակարգով, և հաղթողներին պարգևատրել Երևանի քաղաքապետի հատուկ մրցանակներով: Ինչ վերաբերում է բնական տոնածառների սեզոնային վաճառքի կանոնակարգմանը, Արման Եդոյանը տեղեկացրել է, որ քաղաքապետ Տարոն Մարգարյանի հանձնարարականով մայրաքաղաքի բոլոր վարչական շրջաններում առանձնացվել են համապատասխան տարածքներ, որտեղից և կիրականացվի եղևնիների և սոճիների բացօթյա վաճառքը: Հատուկ ընդգծվել է, որ տվյալ վայրերի ընտրությունը կատարվել է բացառապես փողոցների բանուկ հատվածներից որոշակի հեռավորության վրա` ճանապարհային երթևեկի խցանումները կանխելու նպատակով:
Քաղաքապետարանի աշխատակազմի ներկայացուցիչները նաև հավելել են, որ մայրաքաղաքի վարչական շրջանները ևս նախատեսել են ամանորյա հետաքրքիր միջոցառումներ և մայրաքաղաքն ամբողջությամբ այս տարի, իրոք, տոնական տեսք կունենա:
Վարչությունների պետերը նաև իրենց ամանորյա բարեմաղթանքներն են հղել երևանցիներին ու մաղթել, որ 2012 թվականը լինի խաղաղության և բարեկեցության տարի:
