ՀՀ կառավարության մամլո ծառայությունից «Առաջին լրատվական»-ին տեղեկացնում են, որ վարչապետ Տիգրան Սարգսյանը շնորհավորական ուղերձ է հղել ՌԴ վարչապետ Վլադիմիր Պուտինին` ՌԴ Պետդումայի ընտրություններում «Եդինայա Ռոսիա» կուսակցության տարած հաղթանակի կապակցությամբ:
Ստորև ներկայացնենք Տ. Սարգսյանի ուղերձն ամբողջությամբ.
«Հայաստանի Հանրապետության կառավարության և իմ անունից շնորհավորում եմ Ձեզ՝ ՌԴ Պետդումայի 2011թ. դեկտեմբերի 4-ի ընտրություններում Ձեր գլխավորած կուսակցության՝ «Եդինայա Ռոսիայի» հաղթանակի կապակցությամբ:
Իր գոյության տարիների ընթացքում «Եդինայա Ռոսիան» ապացուցել է, որ քաղաքական հզոր ներուժով կուսակցություն է, որը կարող է իր հետևից տանել հասարակության մեծ զանգվածների և պատասխանատու լինել պետության ապագայի համար:
Օգտվելով առիթից՝ ցանկանում եմ ընդգծել այն հատուկ համագործակցությունը, որ առկա է մեր երկու պետությունների առաջատար քաղաքական ուժերի՝ «Եդինայա Ռոսիայի» և Հայաստանի Հանրապետական կուսակցության միջև»: