Թուրքական Anadolu գործակալության փոխանցմամբ՝ Վաշինգտոնում Թուրքիայի դեսպան Նամըք Թանը հայտարարել է, որ թուրք-ամերիկյան հարաբերություններում աննախադեպ իրադարձություն է գրանցվել։
Ըստ Թանի՝ նախկինում երբեք այնպես չի պատահել, որ նույն ժամանակաշրջանում (ամենայն հավանականությամբ նկատի է առնվում ԱՄՆ նախագահի նախագահության ժամանակաշրջանը – 1-in.am) ԱՄՆ նախագահն ու փոխնախագահն այցելեն Թուրքիա։ Թանը 2010 թվականը որակել է որպես «շատ վատ տարի», մինչդեռ այս տարի նախորդ տարվա հակապատկերն է։
Հիշեցնենք, որ երբ նախորդ տարվա մարտի 4-ին ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովն ընդունեց Հայոց ցեղասպանությունը ճանաչող թիվ 252 բանաձևը, Նամըք Թանը ժամանակավորապես հետ կանչվեց Անկարա:
Ի դեպ, այս տարվա սեպտեմբերի 14-ին Թուրքիան ու ԱՄՆ-ը Անկարայում հուշագիր ստորագրեցին Թուրքիայի տարածքում ՆԱՏՕ-ի ռադիոտեղորոշիչ կայանի (ՌՏԿ) տեղակայման մասին, որի որոշումը կայացվել էր դեռևս նախորդ տարվա նոյեմբերին Լիսաբոնում տեղի ունեցած ՆԱՏՕ-ի համաժողովում:
Այդ կապակցությամբ ամերիկյան The New York Times-ը գրեց, որ այդ ՌՏԿ-ի տեղակայումը վերջին 20 տարիներին Վաշինգտոնի և Անկարայի միջև ռազմական համագործակցության շրջանակներում արված առավել նշանակալից նախագիծն է, և ամենանշանակալից քայլը` սկսած 2003 թվականի իրաքյան պատերազմից։
Դրա ամերիկյան շնորհակալությունն իրեն սպասեցնել չտվեց. հոկտեմբերի վերջին հայտնի դարձավ, որ ԱՄՆ-ը համաձայնել է Թուրքիային հանձնել F-16 Fighting Falcon կործանիչների ծրագրային ապահովման ծածկագրերը։ Խոսքը F-16-ի թռիչքային համակարգն ու սպառազինությունն ամբողջովին վերահսկող համակարգչային ծրագրի մասին է: Դրա շնորհիվ թուրքական կողմը հնարավորություն է ստանում այդ ինքնաթիռների վրա տեղակայել հավելյալ սարքավորում և սեփական արտադրության սպառազինություն։
Թուրքական լրատվամիջոցներն անմիջապես գրեցին, դա աննախադեպ իրադարձություն է, քանի որ ԱՄՆ-ը նման կերպ չի վարվել աշխարհի և ոչ մի երկրի պարագայում: Նրանք ընդգծում էին, որ ցայժմ Lockheed Martin ընկերությունն արտադրել է F-16 տիպի 4200 ինքնաթիռ, որոնք առկա են աշխարհի 26 երկրների ռազմաօդային ուժերի սպառազինությունում, սակայն այդ երկրները, ներառյալ՝ Իսրայելը, իրենց սպառազինության մեջ առկա F-16 ինքնաթիռների արդիականացման համար անպայմանորեն պետք է դիմեն ԱՄՆ-ին, քանի որ նրանց արտադրած ռումբերը, հրթիռները և այլ բաղադրատարրերը չէին ճանաչվում F-16-երի համակարգչային ցանցի կողմից:
