«Առաջին լրատվական»-ը նախօրեին տեղեկացրել էր, որ օրերս Կենտրոն վարչական շրջանի աշխատակիցները «Փարիզյան սուրճի» սեփականատեր, ֆրանսիացի գործարար Վալերի Գործունյանին խնդրել էին ապամոնտաժել իր սրճարանի բացօթյա հատվածը, որը գտնվում է Աբովյան փողոցի վրա։
Այսօր «Փարիզյան սուրճ»-ի սեփականատեր, ֆրանսահայ Վալերի Գործունյանը Երևանի քաղաքապետ Տարոն Մարգարյանի Facebook-ի էջում իր շնորհակալությունն ու աջակցությունն է հայտնել քաղաքապետին։ Նրա կողմից թողած գրառման մեջ ասվում է.
«Սիրելի երևանցիներ, «Փարիզյան սուրճը», ինչպես միշտ, սիրելով Երևանը, Հայաստանը, միայն լավը ցանկանալով Երևան քաղաքին, որոշել է աջակցել քաղաքապետ պարոն Տ. Մարգարյանին՝ Աբովյան փողոցի սիրունությունը ապահովելու համար սրճարանի բացօթյա հատվածի ցելոֆանները հանելով:
Շատ շնորհակալ եմ ամենուն իրենց օգնության համար և վստահ եմ, որ Երևանն ու «Փարիզյանը» իրենց պատմությունը կշարունակեն նույն սիրով հայրենիքի բարելավման համար: Նորեն մերսի ամենուն: Եվ հավատացեք, որ եթե չլինեիք, ես ընդհանրապես գոյություն չէի ունենա: Ես ձեզ շատ եմ սիրում ու նորեն շատ-շատ մերսի իմ ամեն հաճախորդներուն, որոնք ամենն էլ իմ համար իմ բարեկամներն են»:
