Եթե առագաստանավը գիտի, թե ուր է գնում, ոչ մի քամի չի խանգարի, իսկ ՀՀ կառավարությունը չգիտի, թե ուր է գնում: Նման հայտարարություն այսօր Ազգային ժողովի նիստում արեց ՀՅԴ պատգամավոր Արմեն Ռուստամյանը և մեջբերեց մի թևավոր խոսք, որ փոթորկի ժամանակ եղբայրներից մեկը հողմաղաց է կառուցում, մյուսը՝ վրան: «Ո՞րն է Ձեր հողմաղացը և ո՞րն է Ձեր վրանը»,- Ա. Ռուստամյանը հարցրեց ֆինանսների նախարար Վաչե Գաբրիելյանին:
Նա շեշտեց, որ կառավարության գործունեության ժամկետն ավարտվում է և արդեն պետք է արդյունքներ երևային, մինչդեռ ներկա կառավարությունն ամեն տարի արտաքին պարտքն ավելացրել է 1.3 մլրդ դոլարով, վարկային միջոցների տեղաբաշխումը չի եղել արդյունավետ, մեր երկիրը ուզում են դարձնել ծառայություններ մատուցող երկիր, սակայն հենց ծառայությունների ոլորտն առավել խոցելին է արտաքին ռիսկերի հանդեպ, իսկ արտագաղթի ահագնացող տեմպերի արդյունքում ազգային անվտանգության առումով ժողովրդագրական լուրջ վիճակ է ստեղծվել: Մասնավորաապես, այս տարվա հունվար-սեպտեմբերին ուղևորահոսքերի բացասական հաշվեկշիռը եղել է 89 հզ.900 մարդ:
Վ. Գաբրիելյանը պատասխանեց, թե եթե համընթաց քամի է լինում, նավը նպատակակետին շուտ է հասնում, եթե հակընդեմ՝ ուշանում է, փոթորկի ժամանակ արագությունն էլ ավելի է դանդաղում, բայց ուղղությունը մնում է նույնը. «Այս տարիներին կառավարությունը հավատարիմ է եղել կոալիցիոն ծրագրին, ուղղությունները և գերակայությունները չեն փոխվել»:
Նա նշեց, թե ցանկության դեպքում կարելի էր տեսնել հողմաղացները, մասնավորապես, տնտեսական ճգնաժամի ժամանակ համաշխարհային պրակտիկայում առկա բոլոր հնարավոր միջոցառումներից ՀՀ-ում չեն իրականացվել 2 միջոցառում`բանկերին աջակցություն և բանկերում խնայողություներ կորցնող սպառողների համար լուսաբանումներ: Ըստ նախարարի՝ ՀՀ-ում վարկերի էական աճ է տեղի ունեցել՝ տարեկան 20-30%-ով, ինչն աննախադեպ է, և միայն ծավալների ոլորտը չի զարգացվում, այլ էապես ավելացել է նաև արդյունաբերության աճը:
