Հայաստանի առաջիկա ընտրությունների պարագայում ևս, ինչպես եղավ Ռուսաստանում, կտեսնենք իշխող կուսակցության վարկանիշի անկում, այսօր «Պոստ Սկրիպտում» մամուլի ակումբում կանխատեսեց ՄԱԿ կուսակցության ղեկավար Գուրգեն Արսենյանը:
Նրա կարծիքով` Հայաստանի իշխանությունների վերջին չորս տարվա վարած քաղաքականության արդյունքում հասարակության դժգոհությունը ավելի է մեծացել:
«Հայ հասարակության հիմնական դերակատարը` ընտրողը, դժգոհ է, իսկ պաշտոնյաներին փոխելով` ոչինչ չի փոխվի, կադրային փոփոխությունները չեն կարող ազդել արտագաղթի նվազման, կենսամակարդակի բարձրացման վրա»:
Ըստ Գուրգեն Արսենյանի` ընտրությունների կեղծումը չի տեղավորվում ժամանակակից քաղաքակրթության նորմերում, այլ ենթադրում է քրեական պատասխանատվություն`հավելելով, թե իր կարծիքով` ընտրությունները կկեղծվեն:
Հարցին, եթե Արսենյանին առաջարկեն ընդգրկվել ՀՀԿ ցուցակում, նա կհամաձայնի՞, Արսենյանը բացասական պատասխան տվեց: ՄԱԿ ղեկավարը քաղաքական դաշինքների կնքման կողմնակից է այն դեպքում, երբ դրանք կնքվում են աշխարհաքաղաքական տեսանկյունից:
Նա նկատեց, որ մեր երկրում ահագնանում են արտագաղթի չափերը` դրանք կապելով ընտրությունների հետ. «Մենք չենք ստեղծել ՀՀ քաղաքացուն երկրում պահելու բարոյական մեխանիզմ: Ժամանակի քաղաքական իշխանությունն ու ընդդիմությունն են կրում այդ պատասխանատվությունը»:
Ի տարբերություն նախորդ խորհրդարանի` 2012-ի ընտրությունների արդյունքում արմատական ընդդիմությունը խորհրդարանում տեղ կունենա, համոզված է Գ. Արսենյանը: Արսենյանը նշեց, թե ասֆալտի վրա թրծված հռետորը խորհրդարանում լուրջ խնդիր է, և գործընկերները պետք է հաշվի առնեն` ՀԱԿ-ին անվանելով «փողոցային», «ասֆալտի» հռետորներ:
Գուրգեն Արսենյանը նկատեց, որ առաջիկա ընտրություններին հասարակությունը քվեատուփի առջև մերժելու է իշխանություններին, և դա լուրջ անակնկալ է լինելու իշխող կուսակցության համար:
«Առաջին լրատվական»-ի հարցին` համոզվա՞ծ է, որ այս անգամ իշխանությունները չեն կեղծի, և քվեաթերթիկն է արժեք լինելու, նա պատասխանեց` այս անգամ դժվար կլինի մեխանիկական գործընթացներ պարտադրել:
Մեր տարածաշրջանում հնարավոր է` բացասական իրադարձություններ տեղի ունենան, նշեց Գ. Արսենյանը` նկատի ունենալով Իրանի նկատմամբ Իսրայելի հնարավոր գործողությունները:
