Թուրքական Zaman թերթի փոխանցմամբ, Թուրքիայի էներգետիկայի ու բնական պաշարների նախարար Թաներ Յըլդըզը, պատասխանելով լրագրողների հարցերին, հայտարարել է, որ Սիրիայում տիրող քաղաքական անկայունությունը և թուրք-սիրիական հարաբերություններում ստեղծված ճգնաժամը չեն կարող խոչընդոտել դեպի Թուրքիա «Պանարաբական» գազատարի նախագծի իրագործմանը.
««Պանարաբական» գազատարը կնպաստի այն բոլոր երկրների զարգացմանը, որոնք ներառված են այդ նախագծում։ Այդ պատճառով էլ այս նախագիծը չի ներառվել Սիրիայի նկատմամբ մեր պատժամիջոցների ցանկում։ Ժամանակի ընթացքում Թուրքիան կսկսի «Պանարաբական» գազատարով գազ մատակարարել Լիբանան ու Սիրիա»։
Հիշեցնենք, որ Պանարաբական գազատարի կառուցման շուրջ մի շարք արաբական երկրներ պայմանավորվել են 2000 թվականին։ Ներկայիս դրությամբ այն մեկնարկում է Եգիպտոսից և Իսրայելի միջով հասնում Հորդանան ու Սիրիա։
Գազատարի վերջնական փուլով նախատեսվում է գազատարը հասցնել մինչև Թուրքիա, որտեղից արաբական գազը կներթափանցի Եվրոպա։ Դիտարկվում է նաև Թուրքիայի տարածքով ադրբեջանական գազի մատակարարումը Սիրիային ու Հորդանանին։
