Խորվաթ լրագրող Ջեյմս Բրեդդոկը դատական հայց է ներկայացրել Անջելինա Ջոլիի դեմ՝ նրան մեղադրելով գրագողության մեջ: Այս մասին հաղորդում է RadarOnline-ը:
Հայցում Բրեդդոկը նշել է, որ Ջոլիի նկարահանած «Արյան և մեղրի երկրում» (In the Land of Blood and Honey) ֆիլմի սյուժեն ամբողջութամբ համընկնում է 2007 թ. իր հրապարակած հոդվածի իրադարձություններին: Այսպես՝ լրագրողը պնդում է, որ 4 տարի առաջ ինքը նկարագրել է բռնության ենթարկված և ռազմական ճամբարում ստրկուհի դարձած մի կնոջ պատմություն: Հենց այս պատմությունն էլ ընկած է Ջոլիի ֆիլմի հիմքում, ինչը Բրեդդոկը համարում է իր հեղինակային իրավունքների խախտում:
Լրագրողը պահանջել է իրեն փոխհատուցում վճարել, սակայն փոխհատուցման չափը կոնկրետ չի նշվում: Չի հաղորդվում նաև, թե ինչպես են արձագանքել Բրեդդոկի այս հայցին դերասանուհին կամ նրա ներկայացուցիչները:
«Արյան և մեղրի երկրում» ֆիմի պրեմիերան նախատեսվում է դեկտեմբերի 23-ին: Ֆիլմում պատմվում է բոսնիացի մուսուլմանուհու և սերբի սիրո պատմության մասին: Ֆիլմի գործողությունները տեղի են ունենում 1990-ականների սկզբին՝ Բոսնիայում պատերազմից առաջ: Ֆիլմում Ջոլին հանդես է գալիս որպես սցենարիստ և ռեժիսոր:
