Ղարաբաղա-ադրբեջանական բաժանարար գծի վրա կայունությունը ստատուս քվոյի կայունության բաղադրատարրերից մեկն է: «Առաջին լրատվական»-ի հետ զրույցում նման տեսակետ հայտնեց ԼՂ նախկին արտգործնախարար Արման Մելիքյանը՝ անդրադառնալով դեկտեմբերի 6-7-ը Վիլնյուսում կայանալիք ԵԱՀԿ երկրների Նախարարների խորհրդի նիստի շրջանակում Հայաստանի ու Ադրբեջանի ԱԳ նախարարներ Էդվարդ Նալբանդյանի և Էլմար Մամեդյարովի նախատեսված հանդիպմանը:
«Ղարաբաղա-ադրբեջանական շփման գծում միջադեպերի բացառումը թվում է, թե տեխնիկական հարց է, բայց իրականում շփման գծի վրա կայունությունը ստատուս քվոյի կայունության բաղադրատարրերից մեկն է լինելու: Այսինքն՝ մեծ հաշվով, կարող ենք ենթադրել, որ ներկայիս միջոցառումներն ուղղված են նրան, որ ստատուս քվոն պահպանվի այնքան ժամանակ, քանի դեռ ԼՂ հակամարտության քաղաքական լուծումը գտնված չէ, իսկ քաղաքական լուծման հեռանկարներ դեռևս չեն երևում: Ամեն դեպքում այս խնդիրը կնպաստի ստատուս քվոյի ամրապնդմանը, ինչը, կարծում եմ, վնասակար չէ»,- նկատեց Արման Մելիքյանը:
Անդրադառնալով ԵԱՀԿ Մինսկի խմբի համանախագահների՝ վերջին ժամանակներս իրականացրած միջնորդական գործունեությանը՝ ԼՂ նախկին պաշտոնյան նկատեց, որ վերջիններիս ներկայիս գործողություններն առանձնապես չեն տարբերվում նախկինում ծավալած գործունեությունից: «Իսկ համանախագահների աշխատանքը միտված է նրան, որպեսզի մի կողմից՝ տարածաշրջանում և բաժանարար գծի վրա խաղաղություն ապահովվի, մյուս կողմից՝ ապահովվի համանախագահների ներկայությունն ու մասնակցությունը բանակցային գործընթացում»,- նկատեց Արման Մելիքյանը:
Ամփոփելով՝ ԼՂ նախկին արտգործնախարարը նշեց, որ քանի դեռ չկա հակամարտող կողմերի դիրքերի մերձեցում և քանի դեռ գերտերությունները տարածաշրջանի հետագա զարգացումների վերաբերյալ միակարծիք չեն, կողմերից յուրաքանչյուրը շարունակելու է իր որդեգրած քաղաքական գիծը: «Ադրբեջանը, միևնույն է, խոսելու է պատերազմի վերսկսման մասին: Հայկական կողմերն իրենց հերթին պետք է խոսեն խաղաղ կարգավորման իրենց մոտեցումների մասին, որոնք, ըստ իս, հստակ ձևակերպված չեն, և դրանում է հայկական կողմի թուլությունը»:
