Առաջին իրավապաշտպանը պետք է լինի ՀՀ ոստիկանապետը: Այսօր «Առաջին լրատվական»-ի հետ զրույցում նման տեսակետ հայտնեց իրավապաշտպան Արտակ Զեյնալյանը`գնահատելով ՀՀ ոստիկանության գործունեությունը:
Նա նշեց, որ ոստիկանապետը պետք է հասկանա, որ մարդու իրավունքը բարձրագույն, գերագույն արժեք է: Ըստ իրավապաշտպանի` ոստիկանության աշխատանքի գնահատականը տալիս է հասարակությունը իր հավաքական ընկալմամբ, իսկ այսօր ոստիկանությունից հասարակությունը պաշտպանվում է, խուսափում ոստիկանության հետ առնչվելուց: «Այսինքն` հասարակության ընկալման մեջ ոստիկանությունը վտանգ է ներկայացնում»,- նման դիտարկում արեց Ա. Զեյնալյանը:
Իրավապաշտպանն ընդգծեց, որ ոստիկանի կերպարն այսօր ասոցացվում է անարդարություն իրականացնողի հետ: Նրա համոզմամբ, առաջին իրավապաշտպանը պետք է լինի ոստիկանը, այդպես պետք է ընկալվի, այսինքն` իրավապաշտպանները պետք է ըստ էության լինեն անգործ:
Անդրադառնալով ոստիկանի կերպարին` Ա. Զեյնալյանն ասաց, որ ոստիկանը պետք է զբաղվի մարդու հիմնական իրավունքների պաշտպանությամբ: «Կիրթ ոստիկանի համար առաջին տեղում պետք է լինի մարդը, նրա հիմնարար իրավունքները, հիմնարար ազատությունները, որը բարձրագույն արժեք է: Դա նշանակում է, որ դրանից բարձր ոչ մի արժեք չի կարող լինել, այդ թվում` պետության շահը, այդ թվում` ոստիկանապետի շահը, այդ թվում՝ ոստիկանության շահը, դրանք ստորադաս են»,- նշեց Ա. Զեյնալյանը`հավելելով, որ ոստիկանն այնպես պետք է անի, որ մարդն իրեն նսեմացած չզգա:
Իրավապաշտպան Ա. Զեյնալյանը համոզմունք հայտնեց, որ քանի դեռ բացահայտված չեն Ղուլյանի, Խալաֆյանի սպանությունները, ոստիկանության հեղինակությունը մնալու է այնպիսին, ինչպիսին հիմա կա: «Քանի դեռ արդարացի փոխհատուցում չեն ստացել այդ մարդկանց հարազատները, չի բացահայտվել և պատասխանատվության ենթարկվել մեղավորը»,- ամփոփեց իրավապաշտպանը: