Հայ հասարակությունը մի օր հասնելու է թափանցիկ և արդար ընտրությունների, սակայն միշտ չէ, որ այդ թափանցիկ և արդար ընտրությունները ճիշտ են լինելու: Այսօր կայացած մամլո ասուլիսում նման տեսակետ հայտնեց գրող Ռազմիկ Դավոյանը:
Նրա խոսքով, մտավորականության դասը, ուզի, թե ոչ, ընտրությունների վերաբերյալ պետք է իր խոսքն ասի. «Բայց ամեն անգամ չէ, որ ժողովուրդը կամ կուսակցությունները լսում են մեր խոսքը: Ժողովրդին մոլորության մեջ գցող շատ ուժեր կան, և ճիշտ ընտրություն անելու համար քաղաքացին պետք է համոզմունք և հավատ ունենա, մինչդեռ 100 ընտրողից 98-ը հավատ չունի, այլ պարզապես հույս է տածում, որ այս կամ այն ուժին ընտրելու դեպքում ամեն ինչ լավ է լինելու: Իմ ամբողջ հույսը երիտասարդության վրա է: Երիտասարդությունը ուժ է և կարող է հարցեր լուծել, դրա համար էլ մտավորականությունը պետք է համագործակցի երիտասարդության հետ»,- նկատեց գրողը` ավելացնելով, որ պետք է ընտրվեն ուժեր, որոնք կարող են փոխել ժողովրդի վիճակը:
Ռազմիկ Դավոյանի համոզմամբ, քաղաքական պաշտոններ պետք է համարվեն միայն նախագահի և ԱԺ աշխատակազմի ներկայացուցիչներինը, իսկ կառավարությունը պետք է կարողունակ, մասնագիտացված մարմին լինի. «Ինչ էլ լինի, պետք է շնորհակալություն ասենք իշխանություններին, որ Հայոց ցեղասպանության, ԼՂՀ-ի և հայկական բանակի հարցերը գտնվում են պատշաճ մակարդակի վրա»,- ասաց գրողը:
Ասուլիսի մյուս բանախոս ԳԱԱ գրականության ինստիտուտի փոխտնօրեն Վարդան Դևրիկյանը իր հերթին նկատեց, որ ինքը ոչ մի վատ բան չի տեսնում նրանում, եթե մտավորականները ընդգրկվեն տարբեր կուսակցությունների ցուցակում և մուտք գործեն խորհրդարան. «Սա նրա համար, որ Ազգային ժողովում լինեն նաև ինտելեկտուալ մարդիկ: Կուսակցական լինելը ես թերություն չեմ համարում, նույնիսկ առավելություն եմ համարում: Խորհրդարանում հայտնված մտավորականը չի փչանում և չի օգտագործվում՝ հակառակ տարածված կարծիքի, միաժամանակ մարդիկ ավելի շատ վստահում են ոչ մի կուսակցության անդամ չհանդիսացող մտավորականին և չեզոքություն պահողին»:
