Արմավիրի մարզի Նոր Կեսարիա համայնքի գյուղապետ Հրայր Գալստյանը կիրակի կայացած ընտրություններից մի քանի օր առաջ դուրս էր եկել «Բարգավաճ Հայաստան» կուսակցությունից:
Լուրեր էին պտտվում, որ Գալստյանն ընտրվելուց հետո Հանրապետական կուսակցությանն անդամագրվելու դիմում է գրել: «Ազատություն» ռադիոկայանի լրագրողի հետ զրույցում նորընտիր գյուղապետը հաստատել է, որ ինքն ընտրվելուց անմիջապես հետո Հանրապետականին անդամագրվելու որոշում է կայացրել: Նա չի ցանկացել մեկնաբանել իր որոշումը և, անդրադառնալով մամուլի հրապարակումներին, թե իր վրա մարզպետարանից ճնշումներ են եղել, դրանք անվանել է «աբսուրդ»։
Նոր Կեսարիա համայնքի բնակիչները «Ազատություն» ռադիոկայանի հետ զրույցում խուսափել են գնահատել Հրայր Գալստյանի որոշումը: Սակայն, ոմանք կարծիք են հայտնել, որ Հանրապետական կուսակցությունից ճնշումներ են եղել իրենց նորընտիր գյուղապետի վրա, և դրանով է պայմանավորված կուսակցությանն անդամագրվելու նրա որոշումը:
Հետաքրքիրն այն է, որ գյուղացիները պնդում էին, թե գյուղի բնակչության 90 տոկոսը ԲՀԿ-ի համակիրներ են, և առաջիկա ընտրություններում իրենց գյուղում, միևնույնն է, հաղթելու է ԲՀԿ-ն:
Գյուղապետարանի շենքին նախկին գյուղապետի ժամանակ փակցված էր և հիմա էլ կա ցուցանակ, որի վրա գրված է. «Հանրապետական կուսակցության Նոր Կեսարիայի կառույց»: Հրայր Գալստյանն ասել է, թե ինքը դեռ չի որոշել՝ իր պաշտոնավարման օրո՞ք էլ կշարունակի կուսակցության գրասենյակը գործել գյուղապետարանում, թե` ոչ: