Iran News-ի փոխանցմամբ՝ Իրանում մեկնարկել է ամենաերկար նավթատարի կառուցումը։ Խոսքը 420 կիլոմետր երկարություն ունեցող «Նաին-Կաշան-Ռեյ» խողովակաշարի մասին է։
Նշվում է, որ ներկայումս հում նավթի և նավթամթերքի փոխադրման համար նախատեսված Իրանի խողովակաշարերի ընդհանուր երկարությունը կազմում է ավելի քան 13,000 կիլոմետր։ Ընդ որում՝ նավթամուղների երկարությունը կազմում է 3831 կիլոմետր, իսկ նավթամթերքատարներինը՝ 8860 կիլոմետր։
Այդպիսի ցուցանիշների շնորհիվ Իրանը տիրապետում է Մերձավոր ու Միջին Արևելքի խոշորագույն խողովակաշարային ցանցին՝ ինչը նախատեսված է հեղուկ վառելիքի փոխադրման համար։
Իրանական զարգացման հնգամյա պլանով (2011-2015) նախատեսված է, որ 2015 թվականի գարնան դրությամբ նավթամուղների երկարությունը հասցվելու է 5540 կիլոմետրի, իսկ նավթամթերքատարներինը՝ ավելի քան 11,000 կիլոմետրի։
«Նաին-Կաշան-Ռեյ»-ի կառուցումն իրականացվում է հենց այս պլանի շրջանակներում։ Խողովակաշարի տրամագիծը կազմում է 20 դյույմ, այն կառուցվելու է 32 ամսվա ընթացքում։ Խողովակաշարի կառուցումը միտված է երկրի հարավում՝ Բենդեր Աբասի շրջանի նավթավերամշակման գործարանների նավթամթերքի՝ կարճ ճանապարհով Թեհրան և երկրի հյուսիսային շրջաններ փոխադրմանը։
Հիշեցնենք, որ այս տարվա գարնանն Իրանի նավթային պաշարներն աճել էին 5 միլիարդ բարելով՝ հասնելով 155 միլիարդ բարելի, իսկ գազային պաշարները կազմել էին ավելի քան 33 տրիլիոն խորանարդ մետր։
