ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ 2011թ. ԱՊՀ շրջանակում արտգործերի նախարարությունների միջև խորհրդատվությունների ծրագրի համաձայն` դեկտեմբերի 1-2-ը Երևանում կայացել է ԱՊՀ մասնակից պետությունների ԱԳ նախարարությունների միջև խորհրդատվություններ:
Խորհրդատվությունների ընթացքում քննարկվել են տարբեր ձևաչափերով և ուղղություններով ընթացող ԱՊՀ մասնակից պետությունների փոխգործակցությանն առնչվող հարցեր, մասնավորապես, համագործակցությունը սննդի անվտանգության բարձրացման, բեռների և էլեկտրաէներգիայի տարանցիկ փոխադրումների, աշխատանքային միգրացիայի և աշխատող միգրանտների սոցիալական պաշտպանության ոլորտներում:
Քննարկվել և հաստատվել է 2012թ. ԱՊՀ մասնակից պետությունների ԱԳ նախարարությունների միջև խորհրդատվությունների ծրագրի նախագիծը:
Մասնակիցների կողմից ԱՊՀ գործադիր կոմիտեին առաջարկվել է ծրագրի նախագիծը ընդունված կարգով ներկայացնել ԱՊՀ ԱԳ նախարարների խորհրդի հերթական նիստի հավանությանը:
Երևանում տեղի ունեցած խորհրդակցությունների շրջանակներում դեկտեմբերի 1-ին ՀՀ արտաքին գործերի նախարարությունում տեղի է ունեցել ԱՊՀ կազմավորման 20-ամյակին նվիրված նամականիշի մարման արարողությունը, որին ներկա են եղել ՀՀ փոխարտգործնախարար Շավարշ Քոչարյանը, ՀՀ տրանսպորտի և կապի նախարար Մանուկ Վարդանյանը, «Հայփոստ Թրասթ Մենեջմենթ»-ի գլխավոր տնօրեն Խուան Պաբլո Գեչիջյանը և «Հայփոստ» ՓԲԸ գլխավոր տնօրենի պաշտոնակատար Հայկ Ավագյանը:
