Թուրքական Zaman թերթի փոխանցմամբ՝ Թուրքիայի նախագահ Աբդուլլահ Գյուլն այսօր մասնակցել է Ղրղզստանի նորընտիր նախագահ Ալմազբեկ Աթամբաևի երդման արարողությանը։
Դրանից հետո կազմակերպված նախագահական հանդիպմանը մասնակցել են նաև Թուրքիայի փոխվարչապետ Բեքիր Բոզդաղն ու Բիշքեկում Թուրքիայի դեսպան Նեժաթ Աքչալը։ Հանդիպման ժամանակ կողմերը ստորագրել են պայմանագիր, ըստ որի՝ Թուրքիան չեղյալ է հայտարարել մոտ 51 միլիոն դոլարի ղրղզական պարտքը։
Թուրքական կողմից այն ստորագրել է Նեժաթ Աքչալը, իսկ ղրղզական կողմից՝ ֆինանսների նախարար Մելիս Մամբատժանովը։ Հանդիպման ժամանակ Գյուլն ընդգծել է, որ Թուրքիան Ղրղզստանի համար մշտապես մնալու է բարեկամական ու եղբայրական երկիր։
Հիշեցնենք, որ այս տարվա հոկտեմբերի կեսին Թուրքիայի ԱԳՆ-ի նախաձեռնած և Անկարայում տեղի ունեցած «Թյուրքալեզու երկրների անկախության 20-ամյակը» խորագրով միջազգային կոնֆերանսի ժամանակ Գյուլը հայտարարել էր, որ Թուրքիան, Ադրբեջանը, Ղազախստանը, Թուրքմենստանը, Ղրղզստանը և Ուզբեկստանը մեկ ազգ են, 6 պետություն։
