«Սլաք» ակումբի այսօրվա հյուրերն էին` «Առավոտ» օրաթերթի գլխավոր խմբագիր Արամ Աբրահամյանը, «Ժամանակ» թերթի, «Առաջին լրատվական» կայքի գլխավոր խմբագիր Արման Բաբաջանյանը և «Կենտրոն» Հ/Ը ներկայացուցիչը։ Նրանք անդրադարձան նաև հայաստանյան ներքաղաքական իրավիճակին:
Արամ Աբրահամյանը նշեց, որ նկատում է նույն միտումները, որ եղել են 1995-ից. «Մեր քաղաքական միտքն էլ կրկնվում է, լճանում, այստեղ որևէ թարմություն չեմ տեսնում: Ընդդիմությունն ասում է, որ իշխանությունները օր առաջ պետք է հեռանան, բայց ընդդիմությունը 10-15 տարի առաջ էլ էր նույնն ասում։ Իշխանությունն ասում է, որ ազատ, արդար ընտրություններ կանցկացնի, բայց, բնականաբար, չի անցկացնելու»:
«Գլխավոր ինտրիգը շարունակում է մնալ Դուբայում գտնվող Գագիկ Ծառուկյանը, և այն որոշումը, որը նա պետք է կայացնի` կամ գնալ ՀՀԿ-ի հետ նույն ցուցակով ընտրությունների, կամ գնալ ընդդիմություն: Այս ինտրիգը ավելի սրվեց ՀՀ առաջին նախագահ Լևոն Տեր-Պետրոսյանի առաջարկով. ըստ էության, նա արագացրեց պրոցեսը և այն ընտրությունը սրությունը, որն այսօր դրվում է Գագիկ Ծառուկյանի առջև»,- նշեց Արման Բաբաջանյանը:
«Մեզ մոտ քաղաքական մտքի ճգնաժամ է: Մեր ԶԼՄ-ները սպասարկում են քաղաքական ուժերին: Մեր լրատվական դաշտը ամբողջովին հենված է ինտրիգների վրա: Եթե կլիշեներով այսպես շարունակեն շարժվել` ոչինչ չի փոխվի»,- ասաց Պետրոս Ղազարյանը:
Լրատվական դաշտում տիրող իրավիճակին անդրադառնալով` Արամ Աբրահամյանը ասաց նաև. «Ես միշտ աշխատում եմ, այնուամենայնիվ, մնալ պարկեշտության սահմաններում: Միշտ չէ, որ հաջողվում է, միշտ չէ, որ էթիկայի օրենքները պահպանվում են, և միշտ չէ, որ ցնդաբանական գաղափարներ մեր թերթում տեղ չեն գտնում: Ես աշխատում եմ, որ դրանք չլինեն, եթե դրանք կան` կներեք, կաշխատենք՝ ավելի լավ լինի»։
Անդրադառնալով Հայաստանում լրատվական դաշտի առաքելությանը՝ «Ժամանակ» օրաթերթի և «Առաջին լրատվական»-ի գլխավոր խմբագիր Արման Բաբաջանյանը հայտարարեց. «Մեր վերջին տարիների գործունեության նվաճումն այն է, որ մեզ սկսեցին չսիրել միաժամանակ թե՛ ընդդիմադիր դաշտում, թե՛ իշխանական դաշտում, և ես կարծում եմ, որ դրանից կայքը, թերթը շահում են: Այն գաղափարները, որոնց գեներացնողը մենք չպետք է լինեինք` ստիպված մենք ենք լինում և փնտրում ենք քաղաքական դաշտում այն գործիչներին, որոնք կերկրորդեն մեր տեսակետները:
Ես ԱՄՆ-ից Հայաստան չեմ վերադարձել այստեղ ազատ լրատվամիջոց անելու համար, ես հավատացել եմ, որ Հայաստանում փոփոխություն հնարավոր է անել, կանգնել եմ Հայ ազգային կոնգրեսի կողքին, հավատացել եմ այդ քաղաքական ուժի հաղթանակին և համարել եմ, որ Հայաստանում փոփոխություն կարող է իրականացնել բացառապես այդ ուժը:
Ես շարունակում եմ հավատալ, որ այդ քաղաքական ուժն այլընտրանք չունի Հայաստանում, ուստի ամեն ինչ անելու եմ և իմ լրատվամիջոցն էլ ծառայեցնելու եմ այդ հաղթանակին հասցնելու, Հայաստանում քաղաքական արագ փոփոխությունների համար: Երբ բանտից ազատվել եմ, ես հայտարարել եմ, որ լինելու եմ Հայ ազգային կոնգրեսի կողքին և անելու եմ ամեն ինչ Հայաստանում արմատական, համակարգային փոփոխությունների համար»:
Լրագրողի հարցին` «Այսինքն՝ դուք քարոզչությո՞ւն եք իրականացնելու», Արման Բաբաջանյանը պատասխանեց. «Այո»: