ՀՌԱԿ և Արմենական-ՌԱԿ կուսակցությունների միավորման նպատակն է հաստատել ՀՌԱԿ-ը որպես որպես մեկ և միասնական կուսակցություն: Այսօր լրագրողների հետ հանդիպմանը նման տեսակետ հայտնեց Արմենական-ՌԱԿ հանրապետական վարչության ատենապետ Հակոբ Ավետիքյանը` Էդվարդ Անտինյանի հետ միավորման հուշագրի ստորագրման արարողությունից հետո: Ըստ նրա` երկու կուսակցությունների միջև գոյություն ունի գաղափարական ընդհանրություն:
«Իմ զեկուցման մեջ ես շեշտել եմ, որ կուսակցությունը պետք է միավորվի, քանի որ արմենական կուսակցության ներկայացուցիչները ռամկավարներ են եղել: Այս օրվանից մենք հիմք ենք դրել միավորված գործելուն, Սփյուռքում գործող կուսակցության հետ ավելի անմիջական համագործակցություն ստեղծելուն: Ցանկացած միավորում նշանակում է ուժ»,- նշեց Հ. Ավետիքյանը`հավելելով, որ այս միավորումը դա է ազդարարում:
Անդրադառնալով ՀՌԱԿ տարածքների յուրացմանը` բանախոսներն ասացին, որ հրավիրվել են քննիչի մոտ: Անտինյանի փոխանցմամբ` նա երկու անգամ հրավիրվել է քննիչի կողմից, սակայն ոչ մի հարցին ճշգրիտ պատասխան չէր կարող տալ, քանի որ դրանք իր օրոք չեն եղել: Հ. Ավետիքյանը նշեց, որ այն անձը`Մկրյանը, ով գումար էր փոխանցել Վանաձորի գրասենյակի համար, եկավ և ցանկացավ տեսնել իր նվիրած շենքը:
«Սակայն նրան ասել էին, որ այն վաճառվել է, և գործը բացվել էր, հետաքննություն կատարեցինք և հրապարակումներ ունեցանք այդ մասին: Մենք ունեինք գրասենյակներ, բայց դրանք այժմ չկան: Ռամկավարները պահանջում են, որ բոլոր ծալքերը բացվեն: Այսօր հեշտ չէ գրասենյակ ստեղծել Հայաստանի տարածքում»,- մտահոգություն հայտնեց Արմենական-ՌԱԿ վարչության ատենապետը` հավելելով, որ նույն բարերարին խնդրել է նյութապես օգնել, սակայն նա հրաժարվել է`ասելով. առաջինն ի՞նչ եղավ, որ էլի օգնեմ: Հ. Ավետիքյանի համոզմամբ` մարդիկ նվիրաբերում են, այն փոշիանում է:
Անդրադառնալով հետագա համագործակցություններին` Հ. Ավետիքյանն ասաց, որ դեռ չեն համաձայնեցրել, թե ում հետ են համագործակցելու: Նրա համոզմամբ` անշուշտ, լիբերալ դեմոկրատական ուժեր կան: «Վերջերս մենք երկու քննարկում ենք կատարել, որին մասնակցել են այս գաղափարախոսությունը որդեգրած կուսակցությունների ներկայացուցիչները: Այնտեղ նույնագաղափար եզրակացությունների ենք հանգել: Մենք քննարկել ենք և շարունակելու ենք այդ քննարկումները»,- մեկնաբանեց Հ. Ավետիքյանը`հաստատելով, որ Հայաստանում կան դեմոկրատական ուժեր: