Ռուսաստանի վարչապետ Վլադիմիր Պուտինը պաշտպանության նախարար Անատոլի Սերդյուկովից պահանջել է հրաժարականի դիմում գրել այն բանից հետո, երբ տեղեկացել է նրա՝ Ռյազանի դեսանտային ուսումնարաններից մեկում թույլ տված կամայականությունների մասին, այս մասին գրել է «Аргументы Недели» թերթը: Ըստ աղբյուրի` այնտեղ, իբրեւ թե, նախարարը հրապարակայնորեն հայհոյել է «Ռուսաստանի հերոսի» կենտրոնի ղեկավար, գնդապետ Անդրեյ Կրասովին եւ պահանջել քանդել զորամասի տարածքում կառուցված Իլյա Մարգարեի մատուռը։ Ռուսաստանի դեսանտայինների միությունը նախարարից պահանջել է ներողություն խնդրել, սակայն Սերդյուկովը հրաժարվել է դեսանտայինների հետ հանդիպելուց, գրել են ռուսաստանյան լրատվամիջոցները։ Պուտինը Սերդյուկովին դիմել է «դու»-ով, խորհուրդ է տվել հաշտվել դեսանտայինների հետ եւ դեկտեմբերի 1-ից «այլ պաշտոնի անցնելու» կապակցությամբ պաշտոնաթող լինելու մասին դիմում գրել։ Սակայն “Эхо Москвы”-ն, վկայաբերելով Интерфакс-ին, հայտնում է, որ ՌԴ կառավարության աղբյուրների հավաստմամբ, նախարարի հրաժարականի վերաբերյալ պահանջի լուրերը հիմնավոր չեն եւ արժանի չեն անգամ մեկնաբանության: