ԱԺ ՀՅԴ խմբակցության ղեկավար Վահան Հովհաննիսյանը ԱԺ մեծ ընդմիջման ժամանակ ասուլիս էր հրավիրել` հայտարարելու, որ Դաշնակցության բոյկոտը արդյունք տվեց, և կառավարությունը իրենց ճնշման տակ գնաց զիջումների: Վահան Հովհաննիսյանը նշեց, թե առաջին դեպքն է, որ նման իրավիճակում իրենք հաղթեցին, բայց մյուս կողմից՝ իրենցից ոչ մեկը բավարարված չէ կառավարության որոշումից: «Սա առաջին դեպքն է, երբ Դաշնակցությունը դիմում է պառլամենտական պայքարի ծայրագույն միջոցին` բոյկոտին, բայց խնդիրը ոչ թե կառավարության կողմից ներկայացված օրինագծերն ու դրանց բովանդակությունն է,- թեև շատերի հետ մենք համաձայն չենք,- այլ դրանց քննարկման ձևը»,- ասուլիսում հայտարարեց Վ. Հովհաննիսյանը:
Հիշեցնենք, որ կառավարությունն այսօր հետ է վերցրել 24 օրինագիծ: Չնայած դրան, «Լեզվի մասին» օրենքում փոփոխությունների նախագիծը, որն աննախադեպ բողոքի ալիք էր բարձրացրել հանրության մոտ, շարունակում է մնալ արտահերթ նստաշրջանի օրակարգում:
