Թուրքական Haber3 կայքի փոխանցմամբ՝ Ադանայի ոստիկանությունը Էսքիշեհիրում կազմակերպած օպերացիայի արդյունքում հայտնաբերել է դեպի Եվրոպա ուղևորվող մի բեռնատար, որում առկա է եղել 71.3 կիլոգրամ հերոին։
Թուրքական լրատվամիջոցը նշում է, որ այդ բեռնատարը պատկանել է Թուրքիայում ահաբեկչական հռչակված ու արգելված Քրդստանի աշխատավորական կազմակերպությանը (PKK):
Վարորդը ձերբակալված է, ոստիկանական շները բեռնատարում հայտնաբերել են քողարկված առանձին 140 փաթեթներ, որոնցում գտնվել է 71.3 կիլոգրամ հերոին։ Եվրոպայում վերջինիս շուկայական արժեքը կազմում է 2 միլիոն եվրո։
Նշվում է, որ այդչափ թմրանյութը (մեկ չափաբաժնի կտրվածքով) բավական է 713,000 մարդու կողմից գործածվելու համար։ Թուրքական լրատվամիջոցն ընդգծում է, որ PKK-ն ցանկանում էր թունավորել այդչափ եվրոպացիների։
Հիշեցնենք, որ հոկտեմբերի կեսերին էլ թուրքական լրատվամիջոցները գրում էին, թե PKK-ն ֆինանսական աջակցություն է ստանում եվրոպական 14 երկրներից. «Եվրոպական 14 երկրներ բանկերի միջոցով գումարներ են փոխանցում PKK հաշվին։ Վերջին մեկ տարվա ընթացքում PKK-ն ստացել է 200 միլիոն եվրո։ Այդ նպատակով հիմնականում գործածվում է «Եվրոպա-Հաքքարի-Շըրնաք-Վան-Իրաք-Իրան» գիծը»։
