ԵՄ անդամ երկրները ողջունել են Արաբական երկրների լիգայի (ԱԵԼ) կողմից Սիրիայի նկատմամբ սահմանված պատժամիջոցները և իրենց հերթին լրացուցիչ պատժամիջոցներ սահմանել Սիրիայի կառավարության և երկրի նախագահ Բաշար Ալ-Ասադի դեմ: Ինչպես հաղորդում է Reuters գործակալությունը՝ վկայակոչելով դիվանագիտական շրջանակների իր աղբյուրները, նոր պատժամիջոցները մասնավորապես նախատեսում են արգելք դնել Սիրիայի համար առևտրի ոլորտում երկարաժամկետ ֆինանսական օգնության վրա, բացառությամբ առողջապահության և պարենմթերքի ոլորտների:
Բացի այդ, դադարեցվում է բոլոր վարկերի վճարումը՝ ներառյալ դրանց այն մասը, որոնք տրվում են միջազգային ֆինանսական ինստիտուտների միջոցով: ԵՄ երկրների ընկերություններին արգելվում է առևտրական գործարքներ կնքել Սիրիայի պետական պարտքի հաշվին: Նոր պատժամիջոցների համաձայն՝ Սիրիայի բանկերին արգելվում է մասնաճյուղեր բացել ԵՄ տարածքում, ինչպես նաև ներդրումներ կատարել եվրոպական բանկերում:
«Այս միջոցառումները ձեռնարկվում են դեպի Սիրիայի կառավարություն բոլոր ֆինանսական հոսքերը դադարեցնելու համար»,- հայտնել է դիվանագետներից մեկը, որի անունը չի հաղորդվում:
ԵՄ-ն նաև ընդլայնել է այն մարդկանց, ինստիտուտների և ընկերությունների ցուցակը, որոնց հաշիվները կարգելափակվեն, և ում մուտքը ԵՄ երկրներ կարգելվի:
Ավելի վաղ Սիրիայի դեմ պատժամիջոցներ էր սահմանել նաև Արաբական երկրների լիգան, որոնցով նախատեսվում է արգելել Սիրիայի նախագահ Բաշար Ալ-Ասադին և Սիրիայի կառավարության անդամներին մուտք գործել ԱԵԼ անդամ երկրների տարածք և արգելափակել նրանց բանկային հաշիվները:
Սիրիայի իշխանությունները հայտարարել են, որ այդ միջոցառումները կհանգեցնեն երկրի տնտեսական դրության վատթարացմանը և քաղաքական ճգնաժամի սրմանը: