Մեր հարյուր հազարը պետք է հինգ հարյուր հազար դառնա, և վերջ տանք տրտնջանքներին: Այսօր կայացած ՀԱԿ հանրահավաքում այս մասին հայտարարեց հրապարակախոս Տիգրան Պասկևիչյանը:
«Եթե ուզում ենք փոփոխությունների հասնել պետք է հստակ լավ աշխատենք և ոչ ոքի չմեղադրենք»,-ասաց նա:
Նիկոլ Փաշինյանն իր հերթին նկատեց, որ ՀԱԿ-ը մի կարգախոս ունի՝ հեռացնել Սերժ Սարգսյանին, և եթե նա ինքը չհեռանա, ժողովուրդը կստիպի:
Երևանի նախկին քաղաքապետ Վահագն Խաչատրյանն իր հերթին նկատեց, որ հայաստանցիները սկսել են ավելի վատ ապրել և վերջին բյուջեն դրա ապացույցն է:
«Հայաստանը համակարգային ճգնաժամի մեջ է, և մենք պետք է իշխանափոխություն իրականացնենք: Այս բյուջեն մեզ համար տնտեսական բարեկեցություն չի բերելու: Իշխանությունները Հայաստանը կանխամտածված տանում են կործանման: Այս խղճուկ բյուջեի պարագայում անգամ նրանք մտածում են միայն իրենց գրպանի մասին: 2008-ին իշխանությունները խոստացել էին ՀՆԱ-ի ամենամյա աճ՝ 8-10 տոկոսով, որը չի կատարվել ոչ մի տարի: Ներդրումների ծավալի աճ՝ 10 տոկոսով, սա ևս չի կատարվել, պետական եկամուտների աճ՝ չի կատարվել, աղքատության տոկոսի նվազեցում, մինչդեռ աղքատությունն աճել է 3 անգամ՝ հասնելով 34 տոկոսի: Հանուն Հայաստանի՝ իշխանությունն օր առաջ պետք է ինքնակամ հեռանա: Մեր լոզունգը մնում է նույնը՝ Սերժիկ, հեռացիր»: