Ադրբեջանական Turan լրատվական գործակալության փոխանցմամբ՝ ադրբեջանցի հակաիսլամիստ գրող-հրապարակախոս Ռաֆիկ Թագիի սպանությունը միջազգային հնչեղություն է ձեռք բերել։
ԵԱՀԿ ԶԼՄ-ների ազատության հարցերով հատուկ ներկայացուցիչ Դունյա Միյատովիչը հույս է հայտնել, որ այդ հանցագործությունն իրականացնողները պատասխանատվության կենթարկվեն։ Միյատովիչը Թագիի վրա իրականացված հարձակումը որակել է որպես հարձակում մամուլի ու խոսքի ազատության վրա։ Միյատովիչը հիշեցրել է, որ ցայժմ Ադրբեջանում չբացահայտված է մնում լրագրող Էլմար Հուսեյնովի՝ 2005 թվականին իրականացված սպանությունը։
«Լրագրողներ առանց սահմանների» կազմակերպությունը հայտնել է, որ իրեն շոկի մեջ է գցել Ռաֆիկ Թագիի սպանությունը՝ ադրբեջանական իշխանություններից պահանջելով մանրազնին հետաքննել տեղի ունեցածն ու պատժել մեղավորներին։
Ռաֆիկ Թագիի սպանությանն անդրադարձել է նաև Ֆրանսիայի ԱԳՆ-ը, որի մամլո ծառայությունն ընդգծել է, որ Թագիի մահը նշանակում է կյանքից այն ձայնի հեռացում, որին լսում էին երկրի և նրա սահմաններից դուրս ընկած քաղաքական ու լրագրողական շրջանակները։ Ֆրանսիայի ԱԳՆ-ն նույնպես ադրբեջանական իշխանություններից պահաջել է անհապաղ հայտնաբերել ու պատժել սպանությունն իրականացնողներին ու նրանց պատվիրատուներին։
Հիշեցնենք, որ այս տարվա նոյեմբերի 19-ին անհայտ անձինք մոտեցել էին Թագիին և դանակի 4 հարված հասցրել նրա թիկունքին ու պարանոցին։ Դրանից 4 օր անց Թագին մահացել էր հիվանդանոցում։
Ի դեպ, Թագին Էլմար Հուսեյնովից հետո դարձավ իր մասնագիտական գործունեության համար Ադրբեջանում սպանված երկրորդ լրագրողը։