Թուրք գործարարները հետաքրքրված են Հայաստանից հիմնականում սննդի, պղնձի, քարի, սինթետիկ կաուչուկի, հանքային ջրերի ներկրմամբ:
Ինչպես այսօր Երևանում մեկնարկած հայ-թուրքական գործարար համաժողովի ժամանակ լրագրողների հետ զրույցում հայտնեց Հայ-թուրքական գործարար խորհրդի համանախագահ (TABDC) Նոյան Սոյաքը, Թուքիայից Հայաստան արտահանումը կազմում է ընդհանուր ապրանքաշրջանառության 99%-ը. «Հայաստանի գործարարները պետք է ավելի շատ չարչարվեն, որ ծավալները ավելացնեն»: Ընդ որում, Թուրքիան շահագրգիռ է նաև Հայաստանի հետ էներգետիկ համագործակցությամբ, բայց ոչ թե ՀԱԷԿ-ի արտադրանքը ներկրելու առումով, այլ Հայաստանը դիտարկում են որպես տարանցիկ երկիր՝ Սևծովյան ավազանի երկրներից էլեկտրաէներգիա ներկրելու համար:
Ն. Սոյաքի խոսքով՝ առևտրային հարաբերությունները հնարավոր կլինի զարգացնել, եթե քաղաքական առումով ինչ-որ քայլեր արվեն:
Ըստ նրա, սահմանների փակ լինելու պատճառով տուժում են Թուրքիայի սահմանային քաղաքները: Ն. Սոյաքը նշեց, որ թուրք գործարարները չեն կարող շատ մեծ չափով ներազդել քաղաքական գործոնի վրա: Թուրքիայից արտահանումը կազմում է 130 մլրդ դոլար, որից Հայաստանին բաժին է ընկնում մոտ 300 մլն դոլարը, Ռուսաստանին՝ 8 մլրդ դոլարը. «Բնականաբար, այս թվերը խոսում են, որ շատ դժվար է խոշոր մասշտաբի գործունեություն ծավալել: Ամենակարևոր նախապայմանը սահմանների բացումն է, որը կնպաստի ծավալների մեծացմանը»: