ИТАР-ТАСС-ի փոխանցմամբ՝ Կանադայի ԱԳՆ-ը հայտարարել է Իրանի նկատմամբ նոր պատժամիջոցների սահմանման մասին։ Այդ պատժիչ միջոցներով նախատեսվում է արգելք դնել իրանական կառավարության հետ ֆինանսական օպերացիաների վրա։
Բացի այդ, ընդլայնվել է դեպի Իրան արտահանվող արգելված ապրանքների ցանկը, և Կանադա այցելելու վերաբերյալ «սև» ցուցակում ընդգրկվել են նոր անձինք։ Միևնույն ժամանակ նոր պատժամիջոցները չեն տարածվել մինչև նոյեմբերի 20-ը Իրանի նավթային ու գազային արդյունաբերության ոլորտի հետ կնքված պայմանագրերի վրա։
Կանադայի արտգործնախարար Ջոն Բերդի խոսքերով՝ Կանադան խորապես անհանգստացած է ոչ վաղ անցյալում Իրանի միջուկային ծրագրի վերաբերյալ ԱԷՄԳ-ի հրապարակած զեկույցից. «Այդ զեկույցը հերթական ապացույցն է, որ Թեհրանի ռեժիմը ամենալուրջ սպառնալիքն է ներկայացնում գլոբալ խաղաղությանն ու անվտանգությանը։ Դրա հետ կապված՝ մենք պարտավոր ենք ընդունել հավելյալ միջոցներ»։
Հիշեցնենք, որ, Կանադայից բացի, Իրանի նկատմամբ նոր պատժամիջոցներ են սահմանել նաև ԱՄՆ-ն ու Մեծ Բրիտանիան։
