ՀՀ ԶՈՒ պայմանագրային զինծառայող, լեյտենանտ Արտակ Նազարյանի սպանության գործով դատական նիստը տեղի է ունենալու այսօր` 2011թ. նոյեմբերի 23-ին` ժամը 12:00-ին, Շենգավիթի վարչական շրջանի ընդհանուր իրավասության դատարանում:
Այսօր դատարանում ցուցմունք կտա տուժողի իրավահաջորդը՝ Արտակ Նազարյանի մայրը՝ Հասմիկ Հովհաննիսյանը:
Դատաքննության հերթականությունը որոշվել է նախորդ նիստում՝ 16.11.2011թ.: Ըստ այդմ` նախ ցուցմունք կտա տուժողի իրավահաջորդը, ապա՝ վկաները, այնուհետև՝ ամբաստանյալները, վերջում կհետազոտվեն գործում առկա ապացույցները:
Հիշեցնենք, որ Արտակ Նազարյանը սպանվել է 2010թ. հուլիսի 27-ին ծառայության վայրում՝ Տավուշի մարզի Բերդի տարածաշրջանի Չինարի գյուղից ոչ հեռու տեղակայված «Մեհրաբներ» զորամասի հսկողությանը հանձնված մարտական հենակետերից մեկում («Ղոզլու»), որի ավագն էր:
ՀՀ ՊՆ Քննչական ծառայության կատարած նախաքննությունն ավարտվել է և գործը դատարան է մտել որպես «ինքնասպանության դրդում»:
Մինչդեռ Նազարյանները պնդում են, որ նախաքննությունը կատարվել է հանցավոր թերություններով՝ ընդհուպ մինչեւ ապացույցների ոչնչացում և կեղծում (մանրամասները տե՛ս մամուլում Ա. Նազարյանի մոր՝ Հասմիկ Հովհաննիսյանի 28.09.2011թ. բաց նամակում՝ ուղղված զինդատախազ Գ. Կոստանյանին):
Քրեական գործով մեղադրվում են Ա. Նազարյանի 5 ծառայակիցները՝ նրա գումարտակի ԱՏՀԱ գծով տեղակալ, կապիտան Հակոբ Մանուկյանը, հարևան «Լույս» հենակետի ավագ, լեյտենանտ Վահագն Հայրապետյանը, Ա. Նազարյանի դասակի երեք շարքայինները՝ Մխիթար Մխիթարյանը, Ադիբեկ Հովհաննիսյանը և Հարութիկ Կիրակոսյանը: Վերջինի նկատմամբ խափանման միջոց կալանքը փոխվել է, և նա հանձնված է զորամասի հսկողությանը, որտեղ շարունակում է ծառայությունը:
Դատավորը Տավուշի մարզի ընդհանուր իրավասության դատարանի նախագահ Սամվել Մարդանյանն է: Մեղադրանքը պաշտպանում է զինվորական դատախազ Հարություն Հարությունյանը:
Ամբաստանյալների շահերը պաշտպանում են փաստաբաններ Լևոն Պողոսյանը (Վ. Հայրապետյանի պաշտպան), Հրանտ Գևորգյանը (Հ. Մանուկյանի պաշտպան), իսկ 3 շարքայինների՝ Մ. Մխիթարյանի, Ա. Հովհաննիսյանի և Հ. Կիրակոսյանի կողմից ներգրավված են փաստաբաններ Ազատ Շահբազյանը և Ալվարդ Մնացականյանը:
Տուժողի իրավահաջորդն է Արտակ Նազարյանի մայրը՝ Հասմիկ Հովհաննիսյանը: Տուժողի իրավահաջորդի ներկայացուցիչներն են փաստաբաններ Մուշեղ Շուշանյանը, Սեդա Սաֆարյանը և իրավապաշտպան Ռուբեն Մարտիրոսյանը:
Նախորդ նիստում (16.11.2011թ.) ամբաստանյալ Հ. Մանուկյանի պաշտպանը անհամաձայնություն է հայտնել իր վստահորդին վերագրված մեղադրանքի հետ և միջնորդել գործը վերադարձնել դատախազին, սակայն միջնորդությունը մերժվել է: Տուժող կողմը նույնպես անհամաձայնություն է հայտնել մեղադրական եզրակացությանը՝ հայտարարելով, որ «ամբաստանյալները չէին կարող Արտակ Նազարյանին ինքնասպանության հասցնել, որովհետև նրան սպանել են»:
Տուժողի իրավահաջորդի ներկայացուցիչ Ռ. Մարտիրոսյանը բացարկ է հայտնել դատախազին՝ բացարկը հիմնավորելով նախաքննության բազմաթիվ թերություններով և կեղծիքով, սակայն դատավորը մերժել է բացարկը, ինչին հետևել է դատավորի ինքնաբացարկի միջնորդությունը, սակայն այն նույնպես մերժվել է:
Մեղադրող Հարությունյանը հրապարակել է մեղադրական եզրակացությունը. 5 ամբաստանյալներից ոչ ոք իրեն մեղավոր չի ճանաչել:
Տուժող կողմը դատավորին ինքնաբացարկի երկրորդ միջնորդությունն է ներկայացրել, երբ դատավորը դատաքննության հերթականությունը սահմանել է դատախազի առաջարկությամբ՝ հակառակ մնացած բոլոր մասնակիցների ցանկությանը:
Դատավորն իր որոշումը կհրապարակի այսօր:
Եթե նա բացարկ չտա, դատարանում վկայություն կտա Ա. Նազարյանի մայրը՝ Հ. Հովհաննիսյանը: